ഇന്ത്യക്ക് സുപ്രധാനമായ പ്രതിരോധ ഉപകരണങ്ങൾ വിൽക്കുന്നതിന് അനുമതി നൽകി യുഎസ്. ജാവലിൻ മിസൈൽ സിസ്റ്റവും എക്സ്കാലിബർ പ്രിസിഷൻ ഗൈഡഡ് പ്രൊജക്റ്റൈലുകളും അനുബന്ധ ഉപകരണങ്ങളുമാണ് കരാറിൽ ഉൾപ്പെടുന്നത്. 92.8 മില്യൺ ഡോളർ (ഏകദേശം 823 കോടി ഇന്ത്യൻ രൂപ) ആണ് ഈ കരാറിൻ്റെ ആകെ ഏകദേശ ചെലവ്. പ്രതിരോധ സുരക്ഷാ സഹകരണ ഏജൻസി (DSCA) ബുധനാഴ്ച പുറത്തിറക്കിയ പ്രസ്താവനകളിലൂടെയാണ് ഇക്കാര്യം അറിയിച്ചത്.
ഈ സുപ്രധാന വിൽപ്പനയ്ക്ക് ആവശ്യമായ സർട്ടിഫിക്കേഷനുകൾ ഏജൻസി യുഎസ് കോൺഗ്രസിന് കൈമാറുകയും ചെയ്തു. ഈ നിർദ്ദിഷ്ട വിൽപ്പന, യുഎസ്-ഇന്ത്യ തന്ത്രപരമായ പങ്കാളിത്ത ബന്ധം കൂടുതൽ മെച്ചപ്പെടുത്തുമെന്നും, യുഎസിന്റെ വിദേശനയവും ദേശീയ സുരക്ഷാ ലക്ഷ്യങ്ങളും ശക്തിപ്പെടുത്താൻ സാധിക്കുമെന്നും DSCA വ്യക്തമാക്കി.
“ഇൻഡോ-പസഫിക്, ദക്ഷിണേഷ്യൻ മേഖലകളിലെ രാഷ്ട്രീയ സ്ഥിരത, സമാധാനം, സാമ്പത്തിക പുരോഗതി എന്നിവയ്ക്ക് ഒരു പ്രധാന ശക്തിയായി തുടരുന്ന ഒരു പ്രധാന പ്രതിരോധ പങ്കാളിയുടെ സുരക്ഷ വർദ്ധിപ്പിക്കാൻ ഇത് സഹായിക്കും,” DSCA വിലയിരുത്തി.
പ്രധാനമായും രണ്ട് പാക്കേജുകളാണ് ഈ വിൽപ്പനയിൽ ഉൾപ്പെടുന്നത്:
ജാവലിൻ FGM 148 മിസൈലുകൾ (ഫ്ലൈ-ടു-ബൈ) 25 ജാവലിൻ ലൈറ്റ് വെയിറ്റ് കമാൻഡ് ലോഞ്ച് യൂണിറ്റുകൾ (LwCLU) അല്ലെങ്കിൽ ജാവലിൻ ബ്ലോക്ക് 1 കമാൻഡ് ലോഞ്ച് യൂണിറ്റുകൾ. പരിശീലന ഉപകരണങ്ങൾ, മിസൈൽ സിമുലേഷൻ റൗണ്ടുകൾ, ഓപ്പറേറ്റർ മാനുവലുകൾ, സ്പെയർ പാർട്സുകൾ, സാങ്കേതിക സഹായം, മറ്റ് ലോജിസ്റ്റിക്സ് പിന്തുണകൾ എന്നിവയും ഈ 45.7 മില്യൺ പാക്കേജിൽ ഉൾപ്പെടുന്നു.
ഇന്ത്യ ആവശ്യപ്പെട്ട 216 M982A1 എക്സ്കാലിബർ ടാക്ടിക്കൽ പ്രൊജക്റ്റൈലുകൾ വരെ വിൽക്കുന്നതിനാണ് അംഗീകാരം ലഭിച്ചത്. പോർട്ടബിൾ ഇലക്ട്രോണിക് ഫയർ കൺട്രോൾ സിസ്റ്റംസ് (PEFCS), പ്രൈമറുകൾ, പ്രൊപ്പല്ലന്റ് ചാർജുകൾ, സാങ്കേതിക ഡാറ്റ, റിപ്പയർ സേവനങ്ങൾ തുടങ്ങിയ അനുബന്ധ ഇനങ്ങളും ഈ 47.1 മില്യൺ പാക്കേജിൽ ലഭ്യമാക്കും.
ഈ വിൽപ്പന ഇന്ത്യയുടെ പ്രതിരോധ ശേഷിക്ക് വലിയ ഉത്തേജനം നൽകുമെന്ന് DSCA പ്രസ്താവനയിൽ പറഞ്ഞു. ഈ ആയുധങ്ങളും സേവനങ്ങളും ഇന്ത്യൻ സൈന്യത്തിന് എളുപ്പത്തിൽ ഉൾക്കൊള്ളാൻ സാധിക്കുമെന്നും, ഈ വിൽപ്പന മേഖലയിലെ അടിസ്ഥാന സൈനിക സന്തുലിതാവസ്ഥയെ ഒരു തരത്തിലും ബാധിക്കില്ലെന്നും അമേരിക്കൻ ഏജൻസി കൂട്ടിച്ചേർത്തു.
content summary: US Clears $93 Million Sale Of Javelin Missiles, Excalibur Projectiles To India
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
