ചാർലി കിർക്കിന്റെ മരണത്തെ പ്രകീർത്തിക്കുകയോ ന്യായീകരിക്കുകയോ നിസ്സാരമാക്കുകയോ ചെയ്യുന്ന വിദേശികൾക്കെതിരെ നടപടിയെടുക്കുമെന്ന് അറിയിച്ച് യുഎസ് ഭരണകൂടം. യുഎസ് ഡെപ്യൂട്ടി സെക്രട്ടറി ഓഫ് സ്റ്റേറ്റ് ക്രിസ്റ്റഫർ ലാൻഡോയാണ് എക്സിലൂടെ ഇക്കാര്യം വ്യക്തമാക്കിയത്.
പ്രക്ഷോഭവും വിദ്വേഷവും മഹത്വവത്ക്കരിക്കുന്ന വിദേശികൾക്ക് തൻ്റെ രാജ്യത്ത് സ്വാഗതമില്ലെന്നും ചാർലി കിർക്കിന്റെ മരണത്തെ പ്രശംസിക്കുന്നവർക്കും, ന്യായീകരിക്കുന്നവർക്കും, പരിഹസിക്കുന്നവർക്കും എതിരായി ആവശ്യമായ നടപടി സ്വീകരിക്കാൻ വിസാ/കോൺസുലർ ഉദ്യോഗസ്ഥരെ നിർദേശിച്ചിട്ടുണ്ടെന്നും ക്രിസ്റ്റഫർ ലാൻഡോ എക്സിൽ കുറിച്ചു.
ഇസ്രയേലിന്റെ ഗാസയിലെ യുദ്ധത്തെ തുടർന്ന് അമേരിക്കൻ ക്യാമ്പസുകളിൽ പൊട്ടിപ്പുറപ്പെട്ട പ്രതിഷേധങ്ങളോടും വ്യത്യസ്തമായ അഭിപ്രായങ്ങളോടും ട്രംപ് ഭരണകൂടം കർശന നടപടി സ്വീകരിക്കുന്ന പശ്ചാത്തലത്തിലാണ് പുതിയ പ്രസ്താവനയുണ്ടായിരിക്കുന്നത്.
ചാർലി കിർക്കിന്റെ മരണത്തെക്കുറിച്ച് ഇത്തരത്തിലുള്ള സംഭവങ്ങൾ ശ്രദ്ധയിൽപ്പെട്ടാൽ താൻ പോസ്റ്റ് ചെയ്ത എക്സ് പോസ്റ്റിന്റെ കമന്റ് വിഭാഗത്തിൽ അറിയിക്കണമെന്ന് ഉപയോക്താക്കളോട് ലാൻഡോ ആവശ്യപ്പെടുകയും ചെയ്തു. ഈ കമന്റുകൾ കോൺസുലർ ഉദ്യോഗസ്ഥർ നിരീക്ഷിക്കുമെന്നും ലാൻഡോ കുറിപ്പിൽ പറയുന്നു. യു.എസ് ദേശീയ സുരക്ഷാ താൽപ്പര്യങ്ങൾക്കു വിരുദ്ധമായ ആളുകൾക്ക് വിസ അനുവദിക്കേണ്ടതില്ലെന്നതാണ് ഈ ഭരണകൂടത്തിന്റെ നിലപാടെന്നും ലാൻഡോ വ്യക്തമാക്കി.
ഇത് ആദ്യമായല്ല വിദേശികൾക്കെതിരെ നടപടിയെടുക്കാൻ ട്രംപ് ഭരണകൂടം ആഹ്വാനം ചെയ്യുന്നത്. സോഷ്യൽ മീഡിയയിൽ പലസ്തീനോട് സഹാനുഭൂതി പ്രകടിപ്പിച്ചോ ഇസ്രയേലിനെ വിമർശിച്ചോ സംസാരിക്കുന്ന വിദേശ വിദ്യാർത്ഥികളെ കണ്ടെത്താൻ ഇമിഗ്രേഷൻ ആൻഡ് കസ്റ്റംസ് എൻഫോഴ്സ്മെന്റ് (ICE) ഉദ്യോഗസ്ഥരെ യുഎസ് ചുമതലപ്പെടുത്തിയിരുന്നു. സർവകലാശാലാ ക്യാമ്പസുകളിലെ പലസ്തീൻ അനുകൂല പ്രക്ഷോഭങ്ങളിൽ പങ്കെടുത്തവരെയും അവർ ലക്ഷ്യമിട്ടിരുന്നു.
അമേരിക്കൻ വിരുദ്ധ അഭിപ്രായങ്ങൾ പറയുന്ന വിദേശ വിദ്യാർത്ഥികളെ കണ്ടെത്തുന്നതിനായി അവരുടെ സോഷ്യൽ മീഡിയ നിരീക്ഷിക്കാനുള്ള നിർദേശവും അന്വേഷണ ഉദ്യോഗസ്ഥർക്ക് ട്രംപ് ഭരണകൂടം നൽകിയിട്ടുണ്ട്. യു.എസ്. പൗരന്മാർ, സംസ്കാരം, അല്ലെങ്കിൽ രാജ്യത്തിന്റെ അടിസ്ഥാന തത്വങ്ങൾ” എന്നിവയോടുള്ള വൈരാഗ്യം കാണിക്കുന്ന സൂചനകൾ കണ്ടെത്താനാണ് ഡിപ്ലോമാറ്റുകൾക്ക് നൽകിയിരിക്കുന്ന നിർദേശം.
അമേരിക്കയിൽ പഠിക്കാനായി വിസയ്ക്കായി അപേക്ഷിക്കുന്ന അന്തർദേശീയ വിദ്യാർത്ഥികൾക്കായി സോഷ്യൽ മീഡിയ പരിശോധനാ നടപടികളും ഉൾപ്പെടുത്തി. വിസ ലഭിക്കുന്നതിന് മുമ്പ്, അപേക്ഷകർ അവരുടെ സോഷ്യൽ മീഡിയ പ്രൊഫൈലുകൾ തുറന്ന് കാണിക്കണമെന്ന വ്യവസ്ഥയും ഇതിൽ ഉൾപ്പെടുന്നു.
ചാർലി കിർക്കിന്റെ മരണത്തെക്കുറിച്ചുള്ള അഭിപ്രായങ്ങൾപോലും സോഷ്യൽ മീഡിയ പരിശോധനയിൽ ഉൾപ്പെടുത്തുന്നു. ഭിന്നാഭിപ്രായങ്ങളും വിമർശനങ്ങളും നിയന്ത്രിക്കാൻ ട്രംപ് ഭരണകൂടം നടത്തുന്ന ശ്രമങ്ങൾക്ക് വലിയൊരു വ്യാപനമായാണ് ഇതിനെ കാണപ്പെടുന്നത്. ഇത്തരം നടപടികൾ അമേരിക്കയിലെ വിദേശികളെ ലക്ഷ്യമിടുന്നതായാണ് വിമർശകർ പറയുന്നത്. ട്രംപ് ഉൾപ്പെടെ പ്രമുഖ കൺസർവേറ്റീവുകളും റിപ്പബ്ലിക്കൻ നേതാക്കളും, തീവ്ര ഇടതുപക്ഷ രാഷ്ട്രീയ അതിക്രമം ആണ് കിർക്കിന്റെ കൊലപാതകത്തിന് കാരണമെന്നാണ് പ്രതികരിച്ചിരിക്കുന്നത്.
ഓവൽ ഓഫീസിൽ നടത്തിയ പ്രസംഗത്തിൽ അമേരിക്കൻ പ്രസിഡന്റ് കിർക്കിനെ “അമേരിക്കയിലെ മികച്ചവരിൽ ഒരാൾ” എന്നു വിശേഷിപ്പിച്ചു. ഇടതുപക്ഷ പ്രവർത്തകർ നടത്തിയെന്ന് ആരോപിക്കുന്ന അക്രമ സംഭവങ്ങളുടെ പട്ടികയും അദ്ദേഹം അവതരിപ്പിച്ചു. അതേസമയം, എംഎസ്എൻബിസി തന്റെ സീനിയർ പൊളിറ്റിക്കൽ അനലിസ്റ്റായ മാത്ത്യൂ ഡൗഡിനെ പിരിച്ചുവിട്ടു, കാരണം അദ്ദേഹം ലൈവ് പ്രക്ഷേപണത്തിൽ, കിർക്കിന്റെ തീവ്ര വലതുപക്ഷ പ്രചാരണങ്ങളും കടുത്ത പ്രസ്താവനകളും അദ്ദേഹത്തിന്റെ കൊലപാതക സാഹചര്യങ്ങളിൽ പങ്കുവഹിച്ചിരിക്കാം എന്ന് സൂചിപ്പിച്ചിരുന്നു. ട്രംപിന്റെ അടുത്ത അനുയായിയും വലതുപക്ഷ പ്രവർത്തകനുമായ ചാർലി കിർക്കിനെ ബുധനാഴ്ച യുറ്റാ വാലി സർവകലാശാലയിൽ നടന്ന ഒരു പരിപാടിയിൽ സംസാരിക്കുമ്പോൾ വെടിവെച്ച് കൊലപ്പെടുത്തുകയായിരുന്നു.
Content Summary: US officials plan to penalize foreigners who mock or downplay Charlie Kirk’s death
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
