40 ദിവസത്തെ അടച്ചുപൂട്ടലിന് അന്ത്യം കുറിച്ച് യുഎസ് സെനറ്റര്മാര് സര്ക്കാര് വീണ്ടും തുറക്കുന്നതിന് ധാരണയിലെത്തി. സെനറ്റ് റിപ്പബ്ലിക്കന് പാര്ട്ടി നേതാക്കളുമായും വൈറ്റ് ഹൗസുമായും കൂടിയാലോചിച്ച ശേഷം, കുറഞ്ഞത് എട്ട് ഡെമോക്രാറ്റ് സെനറ്റര്മാര് ചേര്ന്നാണ് കരാറിന് രൂപം നല്കിയത്.
ട്രംപിന്റെ പ്രതികരണം
കമാന്ഡേഴ്സ് ഗെയിമിന് ശേഷം വൈറ്റ് ഹൗസിലെത്തിയ പ്രസിഡന്റ് ഡൊണാള്ഡ് ട്രംപ്, അടച്ചുപൂട്ടല് ഉടനെ അവസാനിക്കുമെന്ന് മാധ്യമപ്രവര്ത്തകരോട് പറഞ്ഞു.
”നമ്മള് അടച്ചുപൂട്ടല് അവസാനിക്കുന്നതിനോട് വളരെ അടുത്തുവരികയാണ്. നമ്മുടെ രാജ്യത്തേക്ക് വരുന്ന തടവുകാര്ക്കോ അനധികൃത കുടിയേറ്റക്കാര്ക്കോ ഒരു പൈസ പോലും നല്കാന് ഞങ്ങള് ഒരിക്കലും സമ്മതിക്കില്ല’ ട്രംപ് പറഞ്ഞു.
‘ഡെമോക്രാറ്റുകള് ഇത് മനസ്സിലാക്കുന്നുണ്ടെന്ന് ഞാന് കരുതുന്നു. ഷട്ട്ഡൗണ് അവസാനിക്കുന്നതിനോട് അടുത്താണ് കാര്യങ്ങള്. നിങ്ങള്ക്കത് വളരെ വേഗം മനസ്സിലാകും’ ട്രംപ് കൂട്ടിച്ചേര്ത്തു.
അതേസമയം, ചെറിയ ചിലവഴിക്കല് പാക്കേജ് അവതരിപ്പിക്കാന് തയ്യാറെടുക്കുന്നതിനിടെ, സെനറ്റ് റിപ്പബ്ലിക്കന് നേതാവായ ജോണ് തൂണ്, ഒരു ടെസ്റ്റ് വോട്ട് ‘രൂപപ്പെട്ടുവരുന്നു’ എന്ന് സൂചിപ്പിച്ചു. ”വോട്ടുകള് എങ്ങനെയുണ്ടെന്ന് നമുക്ക് കാണാം. നിങ്ങള് അനുവദിച്ചാല് ഇത്തരത്തിലുള്ള കാര്യങ്ങള് അനിശ്ചിതമായി നീണ്ടുപോയേക്കാം.”
സര്ക്കാര് വീണ്ടും തുറക്കുന്നതിനുവേണ്ടി പാസാക്കിയ ഫണ്ടിംഗ് നടപടിക്ക് മേലും, ഒരു വര്ഷം നീണ്ടുനില്ക്കുന്ന ഏതാനും ഫണ്ടിംഗ് ബില്ലുകള്ക്ക് മേലും വോട്ട് ചെയ്യാന് ചേംബര് പദ്ധതിയിടുന്നതായി അദ്ദേഹം നേരത്തെ മാധ്യമപ്രവര്ത്തകരോട് പറഞ്ഞിരുന്നു.
കരാറിലെ വ്യവസ്ഥകള്
കരാറിന് നേതൃത്വം നല്കിയത് മെയ്നിലെ സെനറ്റര് ആംഗസ് കിംഗ്, ന്യൂ ഹാംഷെയറിലെ ജീന് ഷഹീന്, മാഗി ഹസ്സന് എന്നിവരാണ്. സെനറ്റ് ഭൂരിപക്ഷ നേതാവ് ജോണ് തൂണ്, വൈറ്റ് ഹൗസ് എന്നിവരുമായി സഹകരിച്ചാണ് ഇവര് പ്രവര്ത്തിച്ചത്. കരാറില് പ്രധാനമായും രണ്ട് ഭാഗങ്ങളുണ്ട്. ഒന്ന് പൊതു ധാരണയും മറ്റൊന്ന് ‘മിനിബസ്’ പാക്കേജുമാണ്.
കരാര് പ്രകാരം ഡിസംബര് രണ്ടാം വാരത്തോടെ സെനറ്റ് അഫോര്ഡബിള് കെയര് ആക്റ്റുമായി ബന്ധപ്പെട്ട ഡെമോക്രാറ്റുകളുടെ ബില്ലിന്മേല് സെനറ്റ് വോട്ട് ചെയ്യും. ഷട്ട്ഡൗണുമായി ബന്ധപ്പെട്ട എല്ലാ പിരിച്ചുവിടല് നോട്ടീസുകളും റദ്ദാക്കാനും ജനുവരി വരെ സ്റ്റോപ്പ് ഗ്യാപ് ഫണ്ടിംഗ് നടപടി നീട്ടാനും കരാര് ആവശ്യപ്പെടുന്നു.
മിനിബസ് എന്നറിയപ്പെടുന്ന ബില്ലുകളുടെ പാക്കേജില് കൃഷി പോലുള്ള ചില വകുപ്പുകള്ക്ക് അടുത്ത സാമ്പത്തിക വര്ഷം അവസാനിക്കുന്നതുവരെ ധനസഹായം നല്കുന്ന മൂന്ന് മുഴുവന് വര്ഷത്തെ അപ്രോപ്രിയേഷന് ബില്ലുകള് ഇതില് അടങ്ങിയിരിക്കുന്നു. ജനുവരി 30 വരെ ധനസഹായം നല്കുന്നതിനുള്ള തുടര് പ്രമേയവും ഇതില് ഉള്പ്പെടുന്നു.
കാലാവധി കഴിയാറായ അഫോര്ഡബിള് കെയര് ആക്റ്റ് സബ്സിഡികളുടെ വിപുലീകരണം ഈ കരാറില് ഉള്പ്പെട്ടിരുന്നില്ല. ഇത് നീട്ടിയില്ലെങ്കില് ദശലക്ഷക്കണക്കിന് അമേരിക്കക്കാര്ക്ക് ഇന്ഷുറന്സ് പ്രീമിയം വര്ദ്ധിക്കാന് ഇടയാക്കും. ഷട്ട്ഡൗണിലെ ഒരു പ്രധാന തര്ക്കവിഷയമായിരുന്നു ഇത്. എന്നാല് ഈ പദ്ധതിക്ക് അടുത്ത സെപ്റ്റംബര് വരെ പൂര്ണ്ണമായി ധനസഹായം നല്കും.
പിന്തുണയ്ക്കാതെ ഡെമോക്രാറ്റുകള്
പാക്കേജ് അംഗീകരിക്കുന്നതിന് ഹൗസ് ഡെമോക്രാറ്റുകളുടെ പിന്തുണ ആവശ്യമാണ്, എന്നാല് അവരുടെ പിന്തുണ ഉറപ്പില്ല. സര്ക്കാര് വീണ്ടും തുറക്കുന്നതിന് പകരമായി കുറഞ്ഞ വരുമാനക്കാര്ക്കുള്ള ‘ഒബാമകെയര്’ സബ്സിഡികള് ഒരു വര്ഷത്തേക്ക് നീട്ടണമെന്ന നിലപാടില് പല ഡെമോക്രാറ്റുകളും ഉറച്ചുനില്ക്കുന്നതിനാലാണ് ഡെമോക്രാറ്റിക് പിന്തുണ അനിശ്ചിതമായി തുടരുന്നതെന്ന് അസോസിയേറ്റഡ് പ്രസ് റിപ്പോര്ട്ട് ചെയ്യുന്നു.
സെനറ്റിലെ വോട്ടിംഗ് പരിധി മറികടക്കാന് റിപ്പബ്ലിക്കന്മാര്ക്ക് അഞ്ച് ഡെമോക്രാറ്റിക് വോട്ടുകള് മാത്രമേ ആവശ്യമുള്ളൂ. 10 മുതല് 12 വരെ ഡെമോക്രാറ്റുകള് ചര്ച്ചകളില് പങ്കാളികളായിരുന്നു. അതേസമയം, തൃപ്തികരമായ കരാറല്ലെന്നും പോരായ്മകള് ഉള്ളതാണെന്നും ചില ഡെമോക്രാറ്റുകള് വിമര്ശനം ഉന്നയിക്കുന്നുണ്ട്.
Content Summary: US shutdown is ending; president trump expresses hope
