വാഷിംഗ്ടണ് ഡി.സി.യിലെ വൈറ്റ് ഹൗസ് കറസ്പോണ്ടന്റ്സ് ഡിന്നറിനിടെ വാഷിംഗ്ടണ് ഹില്ട്ടന് ഹോട്ടലില് നടന്ന വെടിവെപ്പിനു പിന്നില് ശക്തമായ ട്രംപ് വിരുദ്ധ വികാരമാണെന്ന സൂചന നല്കി അന്വേഷണ ഉദ്യോഗസ്ഥര്. സുരക്ഷാപ്രതിരോധം അതിക്രമിച്ചു കയറാന് ശ്രമിച്ച പ്രതിയെ കീഴ്പ്പെടുത്തിയതിനെത്തുടര്ന്ന് നടത്തിയ പ്രാഥമിക അന്വേഷണത്തിലാണ് ഈ വിവരങ്ങള് പുറത്തുവന്നത്. പ്രസിഡന്റ് ട്രംപ്, ഭാര്യ, വൈസ് പ്രസിഡന്റ് ജെ ഡി വാന്സ് ഉള്പ്പെടെയുള്ളവര് സ്ഥലത്തുണ്ടായിരുന്നുവെങ്കിലും അവരെല്ലാം സുരക്ഷിതരായിരുന്നു.
കാലിഫോര്ണിയയിലെ ടോറന്സില് നിന്നുള്ള 31 കാരനായ കോള് തോമസ് അലന് ആണ് സംഭവത്തില് പിടിയിലായതെന്ന് തിരിച്ചറിഞ്ഞിട്ടുണ്ട്. പ്രതിയെ തിങ്കളാഴ്ച ഫെഡറല് കോടതിയില് ഹാജരാക്കും. ഫെഡറല് ഓഫീസറെ ആക്രമിക്കല്, തോക്ക് ഉപയോഗിക്കല്, കൊലപാതകശ്രമം തുടങ്ങിയ കുറ്റങ്ങളാണ് നിലവില് ചുമത്തിയിരിക്കുന്നത്. എന്നാല് അന്വേഷണം പുരോഗമിക്കുന്ന മുറയ്ക്ക് ട്രംപിനെ വധിക്കാന് ശ്രമിച്ചെന്ന കുറ്റവും ഇയാള്ക്കെതിരെ ചുമത്തിയേക്കുമെന്ന് ആക്ടിംഗ് യുഎസ് അറ്റോര്ണി ജനറല് ടോഡ് ബ്ലാഞ്ചെ വ്യക്തമാക്കി.
ന്യൂയോര്ക്ക് പോസ്റ്റ് പൂര്ണ്ണരൂപത്തില് പ്രസിദ്ധീകരിച്ച അലന്റെ മാനിഫെസ്റ്റോ (പ്രതിജ്ഞാപത്രം) ഇപ്പോള് അന്വേഷണസംഘം പരിശോധിച്ചു വരികയാണ്. ഈ രേഖയില് ട്രംപ് ഭരണകൂടത്തിലെ ഉദ്യോഗസ്ഥരെ ഏറ്റവും ഉയര്ന്ന മുന്ഗണന നല്കി ലക്ഷ്യമിടേണ്ടവരുടെ പട്ടികയില് ഉള്പ്പെടുത്തിയിട്ടുണ്ട്. എന്നാല് എഫ്.ബി.ഐ ഡയറക്ടര് കാഷ് പട്ടേലിനെ ഇയാള് പട്ടികയില് നിന്നും ഒഴിവാക്കിയിരുന്നു. ‘ഫ്രണ്ട്ലി ഫെഡറല് അസ്സാസിന്’ (സൗഹൃദപരമായ ഫെഡറല് കൊലയാളി) എന്നാണ് ഇയാള് രേഖകളില് സ്വയം വിശേഷിപ്പിക്കുന്നത്.
വെടിവെപ്പ് തുടങ്ങുന്നതിന് പത്ത് മിനിറ്റ് മുമ്പ് പ്രതി തന്റെ കുടുംബാംഗങ്ങള്ക്ക് ഭരണകൂടത്തോടുള്ള അമര്ഷം വ്യക്തമാക്കുന്ന കുറിപ്പുകള് അയച്ചിരുന്നു. ഇത് ശ്രദ്ധയില്പ്പെട്ട കണക്റ്റിക്കട്ടിലെ ന്യൂ ലണ്ടനിലുള്ള അലന്റെ സഹോദരന് ഉടന് തന്നെ പ്രാദേശിക പോലീസിനെ വിവരമറിയിച്ചു. എന്നാല് വെടിവെപ്പ് നടന്ന് ഏകദേശം രണ്ട് മണിക്കൂറിന് ശേഷമാണ് സഹോദരനില് നിന്നും തങ്ങള്ക്ക് വിവരം ലഭിച്ചതെന്ന് ന്യൂ ലണ്ടന് പോലീസ് വ്യക്തമാക്കി.
സംഭവദിവസം വൈകുന്നേരം വാഷിംഗ്ടണ് ഹില്ട്ടണ് ഹോട്ടലിലെ സുരക്ഷാ പരിശോധനയ്ക്കിടെ സെക്യൂരിറ്റി ഏജന്റിന് നേരെ അലന് ഷോട്ട്ഗണ് ഉപയോഗിച്ച് വെടിയുതിര്ക്കുകയായിരുന്നു. എന്നാല് ഏജന്റ് ധരിച്ചിരുന്ന ബുള്ളറ്റ് പ്രൂഫ് ജാക്കറ്റില് വെടിയുണ്ട തട്ടിയതിനാല് അദ്ദേഹം വലിയ പരിക്കുകളില്ലാതെ രക്ഷപ്പെട്ടു. വെടിവെപ്പ് നടന്ന ഉടന് തന്നെ പ്രസിഡന്റ് ഡൊണാള്ഡ് ട്രംപ്, പ്രഥമ വനിത മെലാനിയ ട്രംപ്, വൈസ് പ്രസിഡന്റ് ജെ.ഡി വാന്സ് എന്നിവരെ സുരക്ഷിത സ്ഥാനങ്ങളിലേക്ക് മാറ്റി.
തന്റെ മാനിഫെസ്റ്റോയില് അലന് ഭരണകൂടത്തിനെതിരെ കടുത്ത പരാമര്ശങ്ങളാണ് നടത്തിയിരിക്കുന്നത്. അമേരിക്കന് ഭരണകൂടത്തിന്റെ നടപടികള് തന്നെ പ്രകോപിപ്പിച്ചതായും താന് ഒരു ക്രിസ്ത്യാനിയാണെന്നും അനീതിക്കെതിരെ പ്രതികരിക്കേണ്ടത് തന്റെ കടമയാണെന്നും ഇയാള് അവകാശപ്പെടുന്നു. കിഴക്കന് പസഫിക്കിലെ മയക്കുമരുന്ന് കടത്ത് ബോട്ടുകള്ക്ക് നേരെയുള്ള യുഎസ് ആക്രമണം ഉള്പ്പെടെയുള്ള ഭരണകൂട നടപടികളില് ഇയാള്ക്ക് കടുത്ത അതൃപ്തിയുണ്ടായിരുന്നു.
കാലിഫോര്ണിയയില് നിന്ന് ട്രെയിന് മാര്ഗം ചിക്കാഗോ വഴി വാഷിംഗ്ടണില് എത്തിയ അലന്, സംഭവം നടക്കുന്നതിന് ദിവസങ്ങള്ക്ക് മുമ്പ് തന്നെ ഹോട്ടലില് മുറിയെടുത്തിരുന്നു. ഇയാള് ടോറന്സിലെ സ്വന്തം വീട്ടില് മാതാപിതാക്കള് അറിയാതെ നിരവധി ആയുധങ്ങള് ശേഖരിച്ചിരുന്നതായി മേരിലാന്ഡില് താമസിക്കുന്ന അലന്റെ സഹോദരി വെളിപ്പെടുത്തിയിട്ടുണ്ട്.
അതേസമയം, ’60 മിനിറ്റ്സ്’ എന്ന പരിപാടിക്ക് നല്കിയ അഭിമുഖത്തില് ട്രംപ് പ്രതിയെ ഒരു മാനസികരോഗി എന്ന് വിശേഷിപ്പിച്ചു. അക്രമി തയ്യാറാക്കിയ കുറിപ്പുകള് പരസ്യമായി വായിച്ച മാധ്യമപ്രവര്ത്തക നോറ ഒഡോണലിനെ അദ്ദേഹം വിമര്ശിക്കുകയും ചെയ്തു. ലോകം ഭ്രാന്തമായിക്കൊണ്ടിരിക്കുകയാണെന്നും ഇത്തരം സംഭവങ്ങളില് താന് ആശങ്കാകുലനല്ലെന്നും ട്രംപ് അഭിമുഖത്തില് കൂട്ടിച്ചേര്ത്തു. ഇയാളുടെ ലക്ഷ്യങ്ങളെക്കുറിച്ചും ഗൂഢാലോചനയെക്കുറിച്ചും കൂടുതല് വിവരങ്ങള് കണ്ടെത്താന് ഫെഡറല് ഏജന്സികള് അന്വേഷണം ഊര്ജിതമാക്കിയിട്ടുണ്ട്.
Content Summary: White House press dinner shooting; Anti-Trump sentiment being examined as motive
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
