മെക്സിക്കോ അതിര്ത്തിയില് കുട്ടികളെ മാതാപിതാക്കളില് നിന്നും രക്ഷിതാക്കളില് നിന്നും വേര്പെടുത്തുന്നതിനെ ന്യായീകരിച്ച് യുഎസ് പ്രസിഡന്റ് ഡൊണാള്ഡ് ട്രംപ്. കുടിയേറ്റക്കാര് രാജ്യത്തെ നശിപ്പിക്കുകയാണെന്ന് ട്രംപ് കുറ്റപ്പെടുത്തി. കുടിയേറ്റക്കാരെ ശല്യക്കാരായ പ്രാണികളോടും മറ്റ് ജീവികളോടുമാണ് ട്രംപ് താരതമ്യപ്പെടുത്തിയത്. ഇതിന് ഉത്തരവാദികള് ഡെമോക്രാറ്റുകളാണെന്നും ട്രംപ് ആരോപിച്ചു. അതിര്ത്തിയില് കുട്ടികളെ കുടുംബത്തില് നിന്ന് വേര്പെടുത്തുന്നതിനെതിരെ രൂക്ഷ വിമര്ശനവുമായി ട്രംപിന്റെ ഭാര്യ മെലാനിയ അടക്കമുള്ളവര് രംഗത്തെത്തിയിരുന്നു.
രാജ്യത്തിന്റെ സുരക്ഷയാണ് പ്രധാനമെന്ന് ട്രംപ് പറഞ്ഞു. ഡെമോക്രാറ്റുകള് അനധികൃത ക്രിമിനലുകളായ കുടിയേറ്റക്കാരെ വോട്ടുബാങ്കായി കിട്ടാന് വേണ്ടി അവരെ രാജ്യത്തേയ്ക്ക് പ്രവേശിപ്പിക്കാന് ശ്രമിക്കുകയാണെന്ന് ട്രംപ് ആരോപിച്ചു. കുട്ടികളെ കുടുംബങ്ങളില് നിന്ന് പിരിക്കാന് നിര്ബന്ധിതരാവുകയായിരുന്നു എന്നും ട്രംപ് പ്രതികരിച്ചു. രണ്ടായിരത്തിനടുത്ത് കുട്ടികളെയാണ് ഇത്തരത്തില് ട്രംപ് ഗവണ്മെന്റിന്റെ നയം മൂലം കുടുംബത്തില് നിന്ന് വേര്പിരിച്ചത്.
