മുൻ ഹാരോഡ്സ് ഉടമ മുഹമ്മദ് അൽ ഫയീദിൽ നിന്ന് ലൈംഗിക പീഡനം നേരിട്ട 100-ലധികം പേർക്ക് ഹാരോഡ്സ് കമ്പനിയുടെ നഷ്ടപരിഹാര പദ്ധതി വഴി പണം ലഭിച്ചുതുടങ്ങി. ആഡംബര കടയായ ഹാരോഡ്സ് തന്നെയാണ് ഇക്കാര്യം അറിയിച്ചത്. ഗാർഡിയൻ പത്രമാണ് ഈ വാർത്ത റിപ്പോർട്ട് ചെയ്തത്. കഴിഞ്ഞ വർഷം ബിബിസി ഒരു ഡോക്യുമെന്ററി പുറത്തിറക്കിയിരുന്നു. ‘അൽ ഫയെദ്: പ്രെഡേറ്റർ അറ്റ് ഹാരോഡ്സ്’ എന്നായിരുന്നു അതിന്റെ പേര്. ഈ ഡോക്യുമെന്ററി വന്നതിന് ശേഷമാണ് ഈ പദ്ധതി ആരംഭിച്ചത്. 1977 മുതലുള്ള കാലയളവിൽ മുഹമ്മദ് അൽ ഫയീദിനെതിരെ ഒരുപാട് സ്ത്രീകൾ ലൈംഗിക പീഡന ആരോപണങ്ങൾ ഉന്നയിച്ചിരുന്നു.
ഈ വെളിപ്പെടുത്തലുകളെ തുടർന്നാണ് ഹാരോഡ്സ് ഈ നഷ്ടപരിഹാര പദ്ധതി തുടങ്ങിയത്. മാർച്ചിൽ ആരംഭിച്ച ഈ പദ്ധതിയിലേക്കുള്ള അപേക്ഷകർക്കാണ് ഇപ്പോൾ നഷ്ടപരിഹാരം ലഭിച്ചുതുടങ്ങിയത്. പദ്ധതി അടുത്ത വർഷം മാർച്ച് 31 വരെ തുടരും. അർഹരായവർക്ക് പലതരം നഷ്ടപരിഹാരങ്ങൾക്ക് പദ്ധതിയിലൂടെ അപേക്ഷിക്കാം. പീഡനം കാരണം ഉണ്ടായ പൊതുവായ നഷ്ടങ്ങൾക്ക് 200,000 പൗണ്ട് വരെ ലഭിക്കാം. ജോലിയെ ബാധിച്ച പ്രശ്നങ്ങൾക്ക് നഷ്ടപരിഹാരമായി 150,000 പൗണ്ട് വരെ ലഭിക്കും.
“തെറ്റായ പരിശോധനകൾ” അല്ലെങ്കിൽ ചികിത്സകൾ എന്നിവയ്ക്ക് വേണ്ടിവന്ന പണവും തിരികെ ലഭിക്കും. യോഗ്യതയുള്ള എല്ലാവർക്കും ഹാരോഡ്സിലെ ഒരു ഉയർന്ന ഉദ്യോഗസ്ഥനുമായി നേരിട്ടോ വീഡിയോ കോളിലൂടെയോ സംസാരിച്ച് ക്ഷമാപണം സ്വീകരിക്കാൻ അവസരം ലഭിക്കും. കൂടാതെ, വ്യക്തിഗതമായ ഒരു എഴുതിയ ക്ഷമാപത്രവും അവർക്ക് ലഭിക്കും. എംപിഎൽ ലീഗൽ (MPL Legal) എന്ന നിയമ സ്ഥാപനവുമായി ചേർന്നാണ് ഹാരോഡ്സ് ഈ പദ്ധതി തയ്യാറാക്കിയത്. ഇതിനുള്ള മുഴുവൻ പണവും നൽകുന്നത് ഹാരോഡ്സ് തന്നെയാണ്. ഇരകൾക്ക് മെഡിക്കൽ പരിശോധന നടത്തേണ്ടതില്ലെന്ന് ഹാരോഡ്സ് അറിയിച്ചു.
അവർക്ക് നേരിട്ട് കാര്യങ്ങൾ പറയാതെ, രേഖകൾ മാത്രം നൽകി അപേക്ഷിക്കാം. അൽ ഫയീദിന്റെ പഴയ എയർലൈൻ കമ്പനിയായ ഫയാർ (Fayair – Jersey) Co Ltd-ൽ ജോലി ചെയ്തിരുന്നവരും 2010 മെയ് 7-ന് മുമ്പ് (അൽ ഫയീദ് കമ്പനി വിറ്റ തീയതി) പീഡനം നേരിട്ടവരും ഇനി ഈ പദ്ധതിയിൽ ചേരാൻ യോഗ്യരാണ്. “നഷ്ടപരിഹാര പദ്ധതി തുടങ്ങിയ ശേഷം 100-ൽ അധികം പേർ അപേക്ഷിച്ചു, പലർക്കും യോഗ്യത സ്ഥിരീകരിച്ചു. ഏപ്രിൽ അവസാനം മുതൽ നഷ്ടപരിഹാര തുകയും ഇടക്കാല പണവും നൽകിത്തുടങ്ങി” എന്നാണ് ഹാരോഡ്സ് വ്യക്തമാക്കിയത്. കഴിഞ്ഞ വർഷം 111 സ്ത്രീകൾ ഫയീദിനെതിരെ പരാതി നൽകിയിരുന്നു.
ഏറ്റവും പ്രായം കുറഞ്ഞയാൾക്ക് അന്ന് 13 വയസ്സായിരുന്നു. ലൈംഗിക പീഡനം നേരിട്ടവരോട് മെട്രോപൊളിറ്റൻ പോലീസ് ക്ഷമാപണം നടത്തിയിരുന്നു. ആരോപണങ്ങൾ കൈകാര്യം ചെയ്തതിൽ പോലീസിനെതിരെയും പരാതികളുണ്ട്. ഈ പരാതികൾ ഇൻഡിപെൻഡന്റ് ഓഫീസ് ഫോർ പോലീസ് കണ്ടക്റ്റിന്റെ (IOPC) നിർദ്ദേശപ്രകാരം പോലീസ് തന്നെ അന്വേഷിക്കും. 2023-ൽ ഫയീദ് മരിക്കുന്നതിന് മുമ്പ് വന്ന 21 പരാതികൾ പോലീസ് വീണ്ടും പരിശോധിക്കുകയാണ്. ഇതിൽ രണ്ടെണ്ണം നവംബറിൽ IOPC-ക്ക് കൈമാറിയിരുന്നു.
“ആളുകൾക്ക് സംഭവിച്ച ലൈംഗിക പീഡനത്തിൽ ഞങ്ങൾ നിരുപാധികം ക്ഷമ ചോദിക്കുന്നു. അർഹതപ്പെട്ട എല്ലാവർക്കും ഈ നഷ്ടപരിഹാരം ലഭിക്കണമെന്ന് ഞങ്ങൾ ആഗ്രഹിക്കുന്നു.”എന്നാണ് പദ്ധതിയുടെ വെബ്സൈറ്റിൽ ഹാരോഡ്സ് കുറിച്ചത്. ഒരാൾ ഹാരോഡ്സിന്റെ നഷ്ടപരിഹാര പദ്ധതിക്ക് അപേക്ഷിച്ച് അത് അംഗീകരിക്കുകയാണെങ്കിൽ, അവർക്ക് ലഭിക്കുന്നത് “പൂർണ്ണമായ ഒത്തുതീർപ്പ്” ആയി കണക്കാക്കും. ആ വിഷയത്തിൽ പിന്നീട് നഷ്ടപരിഹാരം ആവശ്യപ്പെട്ട് നിയമപരമായി മുന്നോട്ട് പോകാനുള്ള അവകാശം അവർക്ക് ഇല്ലാതാകും.
content summary: 100 survivors of alleged sexual abuse enter Harrods scheme for compensation
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
