അമേരിക്കൻ ഉത്പന്നങ്ങൾക്ക് മേൽ തീരുവ ചുമത്തുന്ന എല്ലാ രാജ്യങ്ങൾക്ക് മേലും ഉടനെ തീരുവ ചുമത്തുമെന്ന് ട്രംപ് പ്രഖ്യാപനം. ട്രംപിന്റെ ഈ തീരുവ പരിഷ്കരണം ഇന്ത്യയുടെ വാണിജ്യ മേഖലയെയും സാരമായി തന്നെ ബാധിച്ചേക്കാം. യുഎസ് മോട്ടോർസൈക്കിളുകൾക്ക് ഇന്ത്യ 100 ശതമാനം തീരുവയാണ് നിലവിൽ ചുമത്തിയിരിക്കുന്നത്. ഇത് അതേ അളവിൽ തന്നെ അമേരിക്ക നടപ്പിലാക്കിയാൽ ഇന്ത്യയ്ക്ക് തിരിച്ചടിയാവും. യുഎസ് ഡോളറിന്റെ മൂല്യം കുറയ്ക്കാൻ ശ്രമിച്ചാൽ, ബ്രസീൽ, റഷ്യ, ഇന്ത്യ, ചൈന, ദക്ഷിണാഫ്രിക്ക എന്നിവ ഉൾപ്പെടുന്ന ബ്രിക്‌സ് സഖ്യത്തിനെതിരെ 100 ശതമാനം തീരുവ ചുമത്താൻ അമേരിക്കയ്ക്ക് കഴിയുമെന്നും ട്രംപ് പറഞ്ഞിരുന്നു. അമേരിക്കയോടുള്ള മറ്റു രാജ്യങ്ങളുടെ പെരുമാറ്റം നീതിപൂ‍‍ർവ്വമെല്ലെന്ന് വ്യക്തമാക്കുന്നതാണ് മറ്റ് രാജ്യങ്ങൾ അമേരിക്കയ്ക്ക് മേൽ ചുമത്തിയിരിക്കുന്ന തീരുവകളെന്ന് യുഎസ് ഉദ്യോഗസ്ഥർ ചൂണ്ടിക്കാട്ടിയിരുന്നു.
ആഗോള സമ്പദ്‌വ്യവസ്ഥയിൽ ദീർഘകാലമായി നിലനിൽക്കുന്ന അസന്തുലിതാവസ്ഥ പരിഹരിക്കുന്നതിനുള്ള ഒരു സമഗ്ര പദ്ധതി വികസിപ്പിക്കാൻ ഉത്തരവിട്ടുകൊണ്ട് ട്രംപ് ഒരു പ്രസിഡൻഷ്യൽ മെമ്മോറാണ്ടത്തിൽ ഒപ്പുവച്ചിട്ടുണ്ട്.വിദേശ ഉൽപ്പന്നങ്ങൾക്ക് യുഎസ് ഉയർന്ന തീരുവ ചുമത്തിയാൽ അമേരിക്കക്കാർക്ക് കുറച്ച് കാലത്തേക്ക് അസ്വസ്ഥതകൾ നേരിടേണ്ടി വരുമെന്ന് ട്രംപ് സമ്മതിച്ചു. ഉത്പന്നങ്ങളുടെ വിലകൾ ഇതിനാൽ കുറച്ച് കാലത്തേക്ക് കൂടിയേക്കാം എന്നാൽ പിന്നീട് കുറയുമെന്നും ട്രംപ് ഉറപ്പു പറയുന്നുണ്ട്. തീരുവയിലും വിലയിലും വരുന്ന ഈ വ‌‍ർദ്ധനവ് തൊഴിലവസരങ്ങൾ വൻതോതിൽ വർദ്ധിപ്പിക്കുമെന്നും ട്രംപ് അവകാശപ്പെടുന്നു
ഇത് സംബന്ധിച്ച് ഹോവാർഡ് ലുട്‌നിക്കിന്റെ നേതൃത്വത്തിലുള്ള യുഎസ് വാണിജ്യ വകുപ്പ് പഠനങ്ങൾ നടത്തി ഏപ്രിൽ തുടക്കത്തിൽ പ്രസിഡന്റിന് റിപ്പോർട്ട് നൽകും. പുതിയ പദ്ധതി പ്രകാരം അവതരിപ്പിക്കുന്ന തീരുവകളിൽ ഇളവുകൾ ഏർപ്പെടുത്തില്ലെന്നും ട്രംപ് പറഞ്ഞു. രാഷ്ട്രീയവും സാമ്പത്തികവുമായ ഇളവുകൾ നേടിയെടുക്കുന്നതിനായും ലോകമെമ്പാടുമുള്ള രാജ്യങ്ങളുമായുള്ള വാഷിംഗ്ടണിന്റെ വ്യാപാര ബന്ധങ്ങൾ തകർക്കാനുള്ള ട്രംപിന്റെ ഏറ്റവും പുതിയ ശ്രമമാണിത്. ട്രംപ് ഭരണകൂടം പ്രചരിപ്പിച്ച ഒരു പത്രക്കുറിപ്പിൽ, അമേരിക്കൻ തൊഴിലാളിയെ ഒന്നാമതെത്തിക്കുന്നതിനും, വ്യവസായത്തിന്റെ എല്ലാ മേഖലകളിലും മത്സരശേഷി മെച്ചപ്പെടുത്തുന്നതിനും, സാമ്പത്തിക, ദേശീയ സുരക്ഷ ശക്തിപ്പെടുത്തുന്നതിനും നടപടിയെടുക്കുമെന്ന് വാഗ്ദാനം ചെയ്തിരുന്നു.
വ്യാവസായിക രാജ്യങ്ങളുടെ ജി7 ഗ്രൂപ്പിലേക്ക് റഷ്യയെ തിരികെ കൊണ്ടുവരണമെന്നും ട്രംപ് ആവശ്യപ്പെട്ടു, മോസ്കോയെ പുറത്താക്കിയത് തെറ്റായിപ്പോയെന്ന് ട്രംപ് പറഞ്ഞു. ക്രിമിയ പിടിച്ചടക്കിയതിനെത്തുടർന്നാണ് 2014ൽ അന്ന് ജി8 എന്നറിയപ്പെട്ടിരുന്ന ഗ്രൂപ്പിൽ നിന്ന് റഷ്യയെ സസ്‌പെൻഡ് ചെയ്തത്. ഇറക്കുമതിക്ക് മേലുള്ള ഉയർന്ന നികുതികൾ അമേരിക്കയെ വീണ്ടും സമ്പുഷ്ടിയിലേക്ക് എത്താൻ സഹായിക്കുമെന്ന് പ്രസിഡന്റും സഖ്യകക്ഷികളും വിശ്വസിക്കുമ്പോൾ, ലോകത്തിലെ ഏറ്റവും വലിയ സമ്പദ്‌വ്യവസ്ഥയിൽ നിന്നുള്ള ഉയർന്ന തീരുവകളുടെ ഭീഷണി ട്രംപിന്റെ ഇഷ്ടത്തിന് വഴങ്ങാൻ രാജ്യങ്ങളെ പ്രേരിപ്പിക്കുമെന്ന് അവർ അവകാശപ്പെടുന്നു.
നാടുകടത്തപ്പെട്ട കുടിയേറ്റക്കാരെ കൊണ്ടുപോകുന്ന സൈനിക വിമാനങ്ങൾ സ്വീകരിക്കാൻ കൊളംബിയ സമ്മതിച്ചതോടെ, കൊളംബിയയിലേക്കുള്ള തീരുവകൾ മാറ്റിവച്ചു. സ്റ്റീൽ, അലുമിനിയം എന്നിവയുടെ പരിഷ്കരിച്ച തീരുവകൾ അടുത്ത മാസം വരെ നടപ്പിലാക്കില്ലെന്നും ട്രംപ് പറഞ്ഞു. ട്രംപ് ഭരണത്തിൽ തിരികെയെത്തിയതിന് ശേഷമുള്ള ആദ്യ പരിഷ്കരണമാണ് തീരുവ ഏർപ്പെടുത്തൽ. ചൈനയിൽ നിന്നുള്ള ഉൽപ്പന്നങ്ങൾക്ക് 10 ശതമാനം അധിക തീരുവയാണ് ഏർപ്പെടുത്തിയത്. ട്രംപിന്റെ താരിഫ് പരിഷ്കരണം സാമ്പത്തിക വിദഗ്ധരെ ആശങ്കാകുലരാക്കിയിട്ടുണ്ട്. പണപ്പെരുപ്പം ഇതിനകം തന്നെ പിടിമുറുക്കിയിട്ടുണ്ട്. ട്രംപ് വീണ്ടും അധികാരത്തിലെത്തിയ ജനുവരിയിൽ, വാർഷിക നിരക്ക് 3 ശതമാനമായി ഉയർന്നു. വിദേശങ്ങളിലെ വിപണികൾ യുഎസ് കയറ്റുമതി കുറയ്ക്കുമ്പോൾ, സ്വദേശത്തെ വിപണികൾ ഗണ്യമായ ഇറക്കുമതിക്ക് കാരണമാകുന്നുവെന്ന് വൈറ്റ് ഹൗസ് പ്രസ്താവിച്ചു
content summary: Trump warns that US prices might rise as he threatens to impose new tariffs on trade partners.
