ഹിന്‍ഡന്‍ബര്‍ഗ് റിപ്പോര്‍ട്ടിന്റെ പശ്ചാത്തലത്തില്‍ ഒന്നാം സ്ഥാനം നഷ്ടപ്പെട്ട് ഒരു വര്‍ഷത്തിനുള്ളില്‍ മുകേഷ് അംബാനിയെ മറികടന്ന് ഗൗതം അദാനി വീണ്ടും ഇന്ത്യയിലെ ഏറ്റവും വലിയ ധനികനായിരിക്കുന്നു. കഴിഞ്ഞ ദിവസമാണ് അദാനി ഗ്രൂപ്പിനെതിരായ സെബി അന്വേഷണത്തില്‍ അവിശ്വസമാറിയിച്ചുള്ള പൊതു തലപര്യ ഹര്‍ജി സുപ്രിം കോടതി തള്ളിയത്. ഇതിനു പിന്നാലെയാണ് അദാനി വീണ്ടും ഇന്ത്യയിലെ ഏറ്റവും വലിയ ധനികനായി മാറിയിരിക്കുന്നത്. ഹിന്‍ഡന്‍ബര്‍ഗ് റിപ്പോര്‍ട്ടിന്റെ പശ്ചാത്തലത്തില്‍ ഓഹരി മൂല്യത്തിന് ഇടിവ് വന്നതോടെ അദാനിയെ പിന്നിലാക്കി അംബാനി ഒന്നാം സ്ഥാനത്തെത്തിയിരുന്നു. ഈ സ്ഥാനമാണ് സുപ്രിം കോടതി വിധിയോടെ അദാനി വീണ്ടെടുത്തിരിക്കുന്നത്.
ബ്ലൂംബെര്‍ഗ് ബില്യണയേഴ്സ് ഇന്‍ഡക്സില്‍ 97 ബില്യണ്‍ ഡോളറില്‍ എത്തിയ മുകേഷ് അംബാനിയെ 97.6 ബില്യണ്‍ ഡോളര്‍ മൂല്യത്തോടെയാണ് അദാനി മറികടന്നത്. വ്യാഴാഴ്ച അദാനിയുടെ ആസ്തി 89.9 ബില്യണ്‍ ഡോളറായിരുന്നു, അംബാനിയുടേത് 7.7 ബില്യണ്‍ ഡോളറും. ഇരുവരും തമ്മില്‍ വലിയ വ്യത്യസ്മായിരുന്നു കഴിഞ്ഞ ദിവസം വരെ ഉണ്ടായിരുന്നത്. എന്നാല്‍ വെള്ളിയാഴ്ച വിപണികള്‍ തുറന്നതോടെ അദാനിയുടെ ആസ്തി 11.8 ബില്യണ്‍ ഡോളര്‍ ആയി ഉയര്‍ന്നു. ഒരു വര്‍ഷം മുമ്പ് യുഎസ് ഷോര്‍ട്ട് സെല്ലര്‍ ഹിന്‍ഡന്‍ബര്‍ഗ് നടത്തിയ ബോംബ് ഷെല്‍ തട്ടിപ്പ് ആരോപണങ്ങളില്‍ അദാനിക്കെതിരെ കൂടുതല്‍ അന്വേഷണം ആവശ്യമില്ലെന്ന സുപ്രിം കോടതി വിധിയെത്തുടര്‍ന്നാണ് വ്യാഴാഴ്ച മാത്രം അദാനിയുടെ സമ്പത്ത് 4.1 ബില്യണ്‍ ഡോളര്‍ ഉയര്‍ന്നത്.
രണ്ട് ദിവസം കൊണ്ട് ആഗോളതലത്തില്‍ അതിവേഗം വളരുന്ന ശതകോടീശ്വരനാണ് അദാനി, ആകെ അഞ്ച് ദിവസം കൊണ്ട് 12 ബില്യണ്‍ ഡോളറിലധികം നേട്ടമുണ്ടാക്കാന്‍ അദാനിക്ക് കഴിഞ്ഞു. അദാനിയുമായി താരതമ്യപ്പെടുത്തുമ്പോള്‍, അംബാനി സമ്പത്ത് ചാര്‍ട്ടുകളില്‍ സ്ഥിരത പുലര്‍ത്തുന്നുണ്ട്, താരതമ്യേന കഴിഞ്ഞ രണ്ട് വര്‍ഷമായി 80-80-95-ബില്യണ്‍ ഡോളറിന്റെ മധ്യത്തില്‍ തന്നെയാണ് അംബാനിയുടെ മൂല്യം.
ബ്ലൂംബെര്‍ഗ് ബില്യണയേഴ്സ് ഇന്‍ഡക്സ് പ്രകാരം അദാനി നിലവില്‍ ലോകത്തിലെ 12-ാമത്തെ ധനികനാണ്. അംബാനി 13-ാം സ്ഥാനത്താണ്. ഫോര്ബ്സിന്റെ കണക്കനുസരിച്ച്, 100.3 ബില്യണ്‍ ഡോളറിന്റെ ആസ്തിയുള്ള അംബാനി, ആഗോളതലത്തില്‍ 12-ാമത്തെ ധനികനാണ്. ഫോര്ബ്സിന്റെ കണക്കുപ്രകാരം അദാനിയുടെ മൂല്യം 77.9 ബില്യണ്‍ ഡോളറാണ്, കൂടാതെ ലോകത്തിലെ ഏറ്റവും ധനികനായ വ്യക്തികളില്‍ 16-ാം സ്ഥാനമാണുള്ളത്. ഓഹരി വിപണിയെയും അദാനിയുടെ കമ്പനികളുടെ പ്രകടനത്തെയും പരിഗണിക്കുകയാണെങ്കില്‍, അദ്ദേഹം ഒന്നുകില്‍ അംബാനിയുമായി സമ നിലയില്‍ ആവുകയോ അല്ലെങ്കില്‍ റാങ്കിംഗില്‍ അല്‍പ്പം പിന്നിലാക്കുകയോ ചെയ്‌തേക്കാമെന്ന് ടെലിഗ്രാഫ് റിപ്പോര്‍ട്ട് ചെയ്യുന്നു.
ഫോര്ബ്സിന്റെ കണക്കനുസരിച്ച് 21 ബില്യണ്‍ ഡോളര്‍ ആസ്തി കണക്കാക്കുന്ന ഗൗതം അദാനിയുടെ മൂത്ത സഹോദരന്‍ വിനോദ് അദാനി പട്ടികയില്‍ 85-ാം സ്ഥാനത്താണ്. പരമോന്നത കോടതിയുടെ വിധിയില്‍ ‘വിശ്വാസം വിജയിച്ചു’ വെന്ന് അദാനി പ്രതികരിച്ചതായി ടെലിഗ്രാഫ് ഓണ്‍ലൈന്‍ റിപ്പോര്‍ട്ട് ചെയ്യുന്നു. 2021ല്‍ മുകേഷ് അംബാനിയും ഗൗതം അദാനിയും ഇന്ത്യയിലെ ഏറ്റവും ധനികനാകാനുള്ള മത്സരത്തിലായിരുന്നു. അദാനി ലീഡ് നേടുകയും കുറച്ചുകാലം ഒന്നാം സ്ഥാനം നിലനിര്‍ത്തുകയും ചെയ്തിരുന്നു. എന്നാല്‍ ഹിന്‍ഡന്‍ബെര്‍ഗ് റിപ്പോര്‍ട്ട് പ്രസിദ്ധീകരിച്ചതോടെ വ്യവസായം താഴേക്ക് പോയിരുന്നു. കഴിഞ്ഞ വര്‍ഷം അദാനിയുടെ ഓഹരികള്‍ വളരെ കുറഞ്ഞ വിലയിലായിരുന്നപ്പോള്‍, വെഞ്ച്വര്‍ ക്യാപിറ്റലിസ്റ്റുകളും സ്ഥാപനങ്ങളും പോലുള്ള ചില വന്‍കിട നിക്ഷേപകര്‍ അദാനി ഗ്രൂപ്പില്‍ നിക്ഷേപിച്ചിരുന്നു. അദാനി ഷെയര്‍ ഉയര്‍ന്നതോടെ മറ്റ് മൂന്ന് വലിയ വിജയികള്‍ ഈ കമ്പനികളാണ്. വലിയ നേട്ടമാണ് ഇതിലൂടെ ഈ കമ്പനികള്‍ക്ക് ഉണ്ടായിരിക്കുന്നത്. ഇവയില്‍ ഏറ്റവും വലിയ നിക്ഷേപം നടത്തിയത്, ജിക്യുജി പാര്‍ട്ണേഴ്സ് എന്ന കമ്പനിയാണ്. കഴിഞ്ഞ വര്‍ഷം മാര്‍ച്ചിനും ഓഗസ്റ്റിനും ഇടയില്‍ കമ്പനി നടത്തിയ നിക്ഷേപം 4.3 ബില്യണ്‍ ആണ്. അദാനി ഗ്രീന്‍ എനര്‍ജി ഏകദേശം 950 രൂപയുണ്ടായിരുന്നപ്പോള്‍ 500 മില്യണ്‍ ഡോളറില്‍ താഴെ നിക്ഷേപം നടത്തിയ ഖത്തര്‍ ഇന്‍വെസ്റ്റ്മെന്റ് അതോറിറ്റിയാണ് മികച്ച നേട്ടമുണ്ടാക്കിയ മറ്റൊരു താരം. വ്യാഴാഴ്ച അദാനി ഗ്രീന്‍ 1,691 രൂപയിലായിരുന്നു. ഫ്രഞ്ച് കമ്പനിയായ ടോട്ടല്‍ എനര്‍ജീസും കമ്പനിയില്‍ ഓഹരി പങ്കാളിത്തം നേടിയിട്ടുണ്ട്.
അദാനി ഗ്രൂപ്പ് കമ്പനികളുടെ സംയുക്ത വിപണി മൂലധനം താരതമ്യേന കുറവാണ്. ഹിന്‍ഡന്‍ബര്‍ഗ് റിപ്പോര്‍ട്ട് പ്രസിദ്ധീകരിക്കും മുന്‍പുണ്ടായിരുന്ന ഉണ്ടായിരുന്നതിന്റെ പകുതി മാത്രമാണ് ഇപ്പോഴുള്ളത്. ഹിന്‍ഡന്‍ബര്‍ഗ് റിപ്പോര്‍ട്ട് ഉന്നയിച്ച ആരോപണങ്ങളുടെ പ്രതികൂല സ്വാധീനത്തിന്റെ ഫലമായിരുന്നു വിപണി മൂലധനത്തിലുണ്ടായ ഈ ഇടിവ്. 2022-ഉം 2023-ഉം അദാനിയെ സംബന്ധിച്ചിടത്തോളം വലിയ ഉയര്‍ച്ച താഴ്ചകളുടെ രണ്ട് വര്‍ഷങ്ങളായിരുന്നു. 147 ബില്യണ്‍ ഡോളര്‍ മൂല്യമുള്ള ഏറ്റവും ഉയര്‍ന്ന നിലയിലായിരുന്നു അദ്ദേഹം, ഈ സംഖ്യ അദ്ദേഹത്തെ വലിയ വ്യത്യാസത്തില്‍ ഏഷ്യയിലെ ഏറ്റവും ധനികനാക്കുകയും ചുരുക്കത്തില്‍ ലോകത്തിലെ രണ്ടാമത്തെ ധനികനാക്കുകയും ചെയ്തിരുന്നു. ടെസ്ലയുടെയും സ്പേസ് എക്സിന്റെയും ഉടമ എലോണ്‍ മസ്‌കായിരുന്നു ഒന്നാം സ്ഥാനത്ത്. എന്നാല്‍ 2023 ജനുവരിയില്‍ 100 പേജുള്ള ഹിന്‍ഡന്‍ബര്‍ഗ് റിപ്പോര്‍ട്ട് പ്രകാരം അദനിയുടെ കമ്പനി താഴേക്ക് പതിച്ചു. അദാനി ഗ്രൂപ്പിന്റെ സ്റ്റോക്ക് വിലക്കയറ്റത്തെ ‘കോര്‍പ്പറേറ്റ് ചരിത്രത്തിലെ ഏറ്റവും വലിയ വിപത്ത്’ എന്ന് വിശേഷിപ്പിച്ചിരുന്നു. അദാനിയുടെ സ്വകാര്യ സ്വത്ത് 100 ബില്യണ്‍ ഡോളര്‍ എന്നത് 47 ബില്യണ്‍ ഡോളറായി. ഒരു ഘട്ടത്തില്‍ ഗ്രൂപ്പിന്റെ 150 ബില്യണ്‍ ഡോളറിലധികം ഇക്വിറ്റി മാര്‍ക്കറ്റ് മൂല്യം ഇല്ലാതാക്കാനും റിപ്പോര്‍ട്ടിന് കഴിഞ്ഞിരുന്നു. 2022 നവംബറിലെ ഏറ്റവും ഉയര്‍ന്ന സമയത്ത്, ഓഹരിയുടെ വില 3,880 രൂപയായിരുന്നു. 2023 മാര്‍ച്ചോടെ, ഹിന്‍ഡന്‍ബര്‍ഗ് റിപ്പോര്‍ട്ടിനെ തുടര്‍ന്ന്, അത് 1,017 രൂപയായി കുറഞ്ഞു. എന്നാല്‍ വെള്ളിയാഴ്ച, ഓഹരി വില ഏറ്റവും ഉയര്‍ന്ന നിലയില്‍ 3.066 രൂപയിലേക്ക് ഉയര്‍ന്നു, പിന്നീട് ഉച്ചയ്ക്ക് 1 മണിയോടെ 3,027 ല്‍ എത്തി. എന്നിരുന്നാലും, അനലിസ്റ്റുകള്‍ ശ്രദ്ധിക്കുന്നത്, കമ്പനിയുടെ വില-വരുമാന അനുപാതം 141.35 ആണ്, ഇത് അമിതമായി വിലയിരുത്തപ്പെടുമെന്ന് സൂചിപ്പിക്കുന്നുണ്ട്. ഇതിനു പുറമെ അദാനി ഗ്രീന്‍ എനര്‍ജി, അദാനി പോര്‍ട്ട്സ് ആന്‍ഡ് സ്പെഷ്യല്‍ ഇക്കണോമിക് സോണ്‍ എന്നിവയും ഓഹരി നേട്ടത്തിലാണ്. ഇതോടെ തകര്‍ച്ച നേരിടുന്ന ഹോങ്കോംഗ് വിപണിയെ മറികടന്ന് ഇന്ത്യന്‍ ഓഹരി വിപണിയില്‍ കൂടുതല്‍ നേട്ടങ്ങള്‍ അദാനിക്ക് പ്രതീക്ഷിക്കാം.
