വാര്‍ത്തകള്‍ പരിശോധിക്കാന്‍ ഫാക്ട് ചെക്കിംഗ് യൂണിറ്റ്; സുപ്രിം കോടതിയുടെ തീരുമാനത്തിനു മുമ്പേ നിയമം നടപ്പാക്കി കേന്ദ്രസര്‍ക്കാര്‍
സമൂഹ മാധ്യമങ്ങളിലെ ഉള്ളടക്കങ്ങൾ പരിശോധിക്കാനുള്ള പുതിയ യൂണിറ്റിന് പ്രവർത്തനാനുമതി നൽകി കേന്ദ്രസർക്കാർ. ഫാക്ട് ചെക്കിങ് യൂണിറ്റ് (എഫ്സിയു) സ്ഥാപിക്കുന്നത് സ്റ്റേ ചെയ്യാൻ വിസമ്മതിച്ച ബോംബെ ഹൈക്കോടതിയുടെ ഇടക്കാല ഉത്തരവിൽ, സുപ്രീം കോടതി വാദം കേൾക്കാനിരിക്കെയാണ് ഔദ്യോഗികമായി അംഗീകാരം നൽകിയത്.
ഇലക്ട്രോണിക്സ് ആൻഡ് ഐടി മന്ത്രാലയം ബുധനാഴ്ച പ്രസ് ഇൻഫർമേഷൻ ബ്യൂറോയുടെ കീഴിലുള്ള എഫ്‌സിയുവിന് ഇത് സംബന്ധിച്ച അറിയിപ്പ് നൽകി. കേന്ദ്ര സർക്കാരുമായും അതിൻ്റെ ഏജൻസികളുമായും ബന്ധപ്പെട്ട തെറ്റായ വിവരങ്ങളാണെന്ന് തോന്നുന്നവ കണ്ടെത്തി റിപ്പോർട്ട്‌ ചെയ്യാൻ അധികാരമുള്ള നിയമപരമായ യൂണിറ്റ് ആയി ഇനി മുതൽ എഫ്സിയു പ്രവർത്തിക്കും. അതായത് കേന്ദ്രത്തിന് അപ്രിയമോ വ്യാജമോ ആയി തോന്നുന്ന വാർത്തകളും ഉള്ളടക്കങ്ങളും സമൂഹ മാധ്യമങ്ങളിൽ നിന്നും, വാർത്ത വെബ്സൈറ്റിൽ നിന്നു പോലും നീക്കം ചെയ്യപ്പെടും.
ഫേസ്ബുക്, ഇൻസ്റ്റാഗ്രാം,യൂട്യൂബ്, എക്സ് തുടങ്ങിയ സോഷ്യൽ മീഡിയ പ്ലാറ്റ്‌ഫോമുകളിൽ വസ്തുതാ പരിശോധനാ യൂണിറ്റ് തെറ്റായ വിവരങ്ങളായി കണ്ടെത്തുന്ന ഉള്ളടക്കങ്ങൾനീക്കം ചെയ്യാൻ ,നിയമപരമായി ബാധ്യസ്ഥരാണ്.
പരിഷ്‌കരിച്ച ഐടി നിയമങ്ങൾ കഴിഞ്ഞ വർഷം ഹാസ്യനടൻ കുനാൽ കംറയും എഡിറ്റേഴ്സ് ഗിൽഡ് ഓഫ് ഇന്ത്യയും ചില മാധ്യമ സംഘടനകളും ബോംബെ ഹൈക്കോടതിയിൽ ചോദ്യം ചെയ്തിരുന്നു. ജസ്റ്റിസ് ഗൗതം പട്ടേലും ജസ്റ്റിസ് നീലാ കെ ഗോഖലെയും ഹർജിയിൽ വ്യത്യസ്ത വിധി പുറപ്പെടുവിക്കുകയും ചെയ്തു. അഭിപ്രായ സ്വാതന്ത്ര്യത്തിനും മാധ്യമസ്വാതന്ത്ര്യത്തിനുമുള്ള അവകാശത്തെ അത് കാര്യമായി ബാധിക്കുമെന്ന് സ്റ്റേയ്ക്ക് ഉത്തരവിട്ടുകൊണ്ട് ജസ്റ്റിസ് പട്ടേൽ പറഞ്ഞപ്പോൾ ജസ്റ്റിസ് നീല കെ ഗോഖലെ നിയമം ശരി വച്ചിരുന്നു. വ്യത്യസ്ത വിധിയിൽ അഭിപ്രായം പറയാൻ നിയോഗിക്കപ്പെട്ട മൂന്നാമത്തെ ജഡ്ജി ജസ്റ്റിസ് എ എസ് ചന്ദൂർക്കർ ഇതുവരെ അന്തിമ തീരുമാനം പറഞ്ഞിട്ടില്ല. എന്നിരുന്നാലും, മാർച്ച് 11 ന് എഫ്സിയു സ്ഥാപിക്കുന്നത് സ്റ്റേ ചെയ്യാൻ അദ്ദേഹം വിസമ്മതിച്ചതിനെത്തുടർന്ന്, മാർച്ച് 13 ന് ഡിവിഷൻ ബെഞ്ച് 2: 1 ഭൂരിപക്ഷത്തോടെ എഫ്‌സിയുവിൻ്റെ വിജ്ഞാപനം സ്റ്റേ ചെയ്യില്ലെന്ന് ഔദ്യോഗികമായി പ്രഖ്യാപിച്ചു.
സർക്കാരിന് താൽപ്പര്യ വിരുദ്ധമുള്ള കാര്യങ്ങളിൽമധ്യസ്ഥനായി പ്രവർത്തിക്കുന്ന ഫാക്റ്റ് ചെക്ക് യൂണിറ്റ് എത്രമാത്രം നീതിയുക്തമായി നിലപാട് എടുക്കുമെന്നത് സംശയമാണ്.
സർക്കാരിനെ വിമർശിക്കുന്ന റിപ്പോർട്ടുകൾ പ്രസിദ്ധീകരിക്കുന്ന സാഹചര്യത്തിൽ ഉൾപ്പെടെ മാധ്യമ സ്വാതന്ത്ര്യത്തിലെ ആശങ്കകളും ഉയർത്തി കാണിക്കുന്നുണ്ട്.
സോഷ്യൽ മീഡിയ പ്ലാറ്റ്‌ഫോമുകൾ മീഡിയ കമ്പനികൾക്ക് ഉള്ളടക്കം പ്രചരിപ്പിക്കുന്നതിനുള്ള ഒരു പ്രധാന ഉപകരണമാണ്. എഫ്സിയു വ്യാജമാണെന്ന് പ്രസ്ഥാവിക്കുന്ന ഒരു റിപ്പോർട്ടിലേക്കുള്ള ലിങ്കുകൾ സമൂഹ മാധ്യമങ്ങളിൽ നിന്ന് നീക്കംചെയ്യാൻ സർക്കാർ നിർദേശിക്കും. കോൺഗ്രസ്, തൃണമൂൽ, ആർജെഡി എന്നിവയുൾപ്പെടെ പ്രതിപക്ഷ പാർട്ടികൾ കഴിഞ്ഞ വർഷം തീരുമാനത്തെ വിമർശിച്ചതോടെ, സർക്കാർ പിന്തുണയുള്ള എഫ്സിയു വിശ്വസനീയമായ രീതിയിൽ പ്രവർത്തിക്കുമെന്ന് സർക്കാർ ഉറപ്പ് നൽകിയിരുന്നു.
ഇലക്ട്രോണിക്സ് ആൻഡ് ഐടി മന്ത്രാലയത്തിൻ്റെ ഗസറ്റ് വിജ്ഞാപനത്തിൽ , “ഇൻഫർമേഷൻ ടെക്‌നോളജി (ഇൻ്റർമീഡിയറി ഗൈഡ് ലൈൻസ് ആൻഡ് ഡിജിറ്റൽ മീഡിയ എത്തിക്‌സ് കോഡ്) റൂൾസ്, 2021 നൽകുന്ന അധികാരങ്ങൾ വിനിയോഗിച്ച്, കേന്ദ്ര സർക്കാർ
രിന് വേണ്ടി വസ്തുത പരിശോധന നടത്താൻ എഫ് സി യു ഇൻഫർമേഷൻ ആൻഡ് ബ്രോഡ്കാസ്റ്റിംഗ് മന്ത്രാലയത്തിൻ്റെ കീഴിലുള്ള പ്രസ് ഇൻഫർമേഷന്റെ പരുധിയിൽ പ്രവർത്തിക്കും. ” എന്ന് പറയുന്നു.
പ്രവർത്തനപരമായി, ഈ യൂണിറ്റ് ഉള്ളടക്കത്തിൻ്റെ ഒരു ഭാഗം വ്യാജമാണെന്ന് കണ്ടെത്തുമ്പോൾ, ഐടി നിയമങ്ങൾക്ക് കീഴിലുള്ള അവരുടെ ജാഗ്രതാ ആവശ്യകതയുടെ ഭാഗമായി സോഷ്യൽ മീഡിയ പ്ലാറ്റ്‌ഫോമുകൾ അത് നീക്കം ചെയ്യേണ്ടിവരും. വാസ്തവത്തിൽ, സോഷ്യൽ മീഡിയ കമ്പനികൾ മാത്രമല്ല, ജിയോ, എയർടെൽ പോലുള്ള ഇൻ്റർനെറ്റ്, ടെലികോം സേവന ദാതാക്കൾക്ക് പോലും ആ വിവരങ്ങൾ ബ്ലോക്ക് ചെയ്യേണ്ടിവരും, അതായത് ഒരു പ്രത്യേക റിപ്പോർട്ടിൻ്റെ വെബ് ലിങ്ക് ബ്ലോക്ക് ചെയ്യപ്പെടാൻ സാധ്യതയുണ്ട്. 2023 ജനുവരിയിൽ, ഐടി മന്ത്രാലയം 2021 ലെ ഐടി ചട്ടങ്ങളിലെ കരട് ഭേദഗതികൾ പുറത്തിറക്കി, സോഷ്യൽ മീഡിയയിലെ ഉള്ളടക്കം നിരീക്ഷിക്കുന്നതിനും കേന്ദ്രത്തിൻ്റെ ബിസിനസുമായി ബന്ധപ്പെട്ട തെറ്റായ വിവരങ്ങൾ ഫ്ലാഗുചെയ്യുന്നതിനും പിഐബിയുടെ വസ്തുതാ പരിശോധന യൂണിറ്റിന് അധികാരം നൽകണമെന്ന് നിർദ്ദേശിച്ചു. ഏപ്രിലിൽ, ഒടുവിൽ നിയമങ്ങൾ വിജ്ഞാപനം ചെയ്തപ്പോൾ, പ ഐ ബി യൂണിറ്റിൻ്റെ പരാമർശം ഒഴിവാക്കി, പകരം കേന്ദ്ര സർക്കാരിൻ്റെ ഒരു വസ്തുതാ പരിശോധന യൂണിറ്റ് സ്ഥാപിക്കുകയായിരുന്നു. ഈ മാറ്റം പ്രതിപക്ഷ പാർട്ടികളും മാധ്യമപ്രവർത്തകരും ഉൾപ്പെടെയുള്ള നിരവധി ആളുകളെ ബാധിക്കുമെന്ന് വിദഗ്ധർ നേരത്തെ ചൂണ്ടികാണിച്ചിരുന്നു. കോൺഗ്രസ്, ടിഎംസി, ആർജെഡി, സിപിഐ എം തുടങ്ങിയ,പ്രതിപക്ഷ പാർട്ടികൾ കഴിഞ്ഞ വർഷം സർക്കാരിൻ്റെ തീരുമാനത്തിനെതിരെ കടുത്ത വിമർശനവുമായി രംഗത്തെത്തിയിരുന്നു. ഡിജിറ്റൽ അവകാശ പ്രവർത്തകരും എഡിറ്റേഴ്സ് ഗിൽഡ് ഓഫ് ഇന്ത്യ പോലുള്ള പ്രസ് അസോസിയേഷനുകളും നിയമങ്ങളെ “ക്രൂരം” എന്ന് വിളിച്ചു.
