ഇസ്രയേല്‍ സൈബര്‍ ഹാക്കിംഗ് സ്ഥാപനങ്ങളുമായി ഇന്ത്യന്‍ അന്വേഷണ ഏജന്‍സിക്ക് ബന്ധം
തെരഞ്ഞെടുപ്പ് അടുത്തിരിക്കുന്നതു കൊണ്ട് തന്നെ ദേശിയ അന്വേഷണ ഏജൻസികളുടെ നീക്കങ്ങൾ വലിയ വാർത്തയാവുകയാണ്. ഇപ്പോഴിതാ ഐഫോൺ ഹാക്കിങ് അടക്കം നടത്തുന്ന ഒരു സൈബർ ഫോറൻസിക് സ്ഥാപനത്തിൽ നിന്ന് ഇഡി സേവനങ്ങൾ തേടാറുണ്ടെന്ന റിപ്പോർട്ടുകളാണ് പുറത്ത് വന്നുകൊണ്ടിരിക്കുന്നത്. ഡൽഹി മുഖ്യമന്ത്രി അരവിന്ദ് കെജ്‌രിവാളിന്റെ ഐഫോൺ അടക്കം നിരീക്ഷിക്കണമെന്ന ഇഡിയുടെ ആവശ്യം കോടതി തള്ളിയ സാഹചര്യത്തിൽ, ഇസ്രായേൽ കമ്പനിയുമായി ബന്ധമുണ്ടെന്ന് പറയുന്ന സ്ഥാപനത്തിന്റെ ഉപഭോക്താവാണ് ഇഡി എന്ന വാർത്ത ആശങ്ക ഉണ്ടാക്കുന്നതാണ്. പെഗാസസ് മാൽവെയർ ഉൾപ്പെടെ, വീണ്ടുമൊരു സുരക്ഷാ ഭീഷണിയുടെ മുന്നറിയിപ്പ് ആപ്പിളും പുറത്തുവിടുന്നുണ്ട്.
മദ്യനയ കേസിൽ നിലവിൽ കസ്റ്റഡിയിലുള്ള കെജ്‌രിവാളിന്റെ ഐഫോണിൽ നിന്ന് വിവരങ്ങൾ ശേഖരിക്കാനുള്ള ശ്രമങ്ങളിലായിരുന്നു എൻഫോഴ്‌സ്‌മെൻ്റ് ഡയറക്ടറേറ്റ്. കെജ്‌രിവാൾ ഫോണിലെ വിവരങ്ങൾ അന്വേഷണ ഉദ്യോഗസ്ഥർക്ക് നൽകാൻ സഹകരിക്കുന്നില്ലെന്ന് ഇഡി കോടതിയെ അറിയിച്ചിരുന്നു. അന്വേഷണ ഉദ്യോഗസ്ഥർ ഫോണിലെ വിവരങ്ങൾ ചോർത്തുകയോ, രാഷ്ട്രീയ ആവശ്യങ്ങൾക്കായി ഉപയോഗപ്പെടുത്തുകയോ ചെയ്യുമെന്ന ആശങ്ക കെജ്‌രിവാളും കോടതിയിൽ വാദിച്ചു. ഐഫോണിന്റെ പിൻ ഉപയോഗിച്ച് അൺലോക്ക് ചെയ്യാൻ കഴിയില്ലെന്ന് ആപ്പിളും വ്യക്തമാക്കിയിരുന്നു.
ഇതിനു പിന്നാലെയാണ് ഡൽഹി ആസ്ഥാനമാക്കി പ്രവർത്തിക്കുന്ന ഒരു സൈബർ ഫോറൻസിക് സ്ഥാപനത്തിൻ്റെ ഉപഭോക്താവാണ് ഇഡി എന്ന വിവരങ്ങൾ പുറത്തുവരുന്നത്. Nextechno Gen എന്ന കമ്പനിയുടെ വെബ്‌സൈറ്റിൽ നൽകിയിരിക്കുന്ന വിവരങ്ങൾ അനുസരിച്ച് കമ്പനി പ്രധാനമായും നൽകുന്ന സേവനങ്ങളിൽ ഐഫോൺ-ക്രാക്കിംഗ് ആണ്. കൂടാതെ വെബ്‌സൈറ്റിൽ, ഇസ്രായേലി ടെക് സ്ഥാപനമായ സെലിബ്രൈറ്റിനൊപ്പം പ്രവർത്തിക്കുന്നതായും പരാമർശിക്കുന്നുണ്ട്. വളരെ സുരക്ഷിതമായ ഉപകരണങ്ങളായി കണക്കാക്കപ്പെടുന്ന ആപ്പിൾ നിർമ്മിച്ച ഐഫോണുകൾ അൺലോക്ക് ചെയ്യാനുള്ള കഴിവിന് പേരുകേട്ടതാണ് സെലിബ്രൈറ്റ്.
മദ്യനയ കേസിൽ നിലവിൽ കസ്റ്റഡിയിലുള്ള കെജ്‌രിവാളിൽ നിന്ന് എടുത്ത ഐഫോൺ അൺലോക്ക് ചെയ്യാൻ സഹകരിക്കുന്നില്ലെന്ന് ഇഡി കോടതിയെ അറിയിച്ചിരുന്നു. അന്വേഷണ ഉദ്യോഗസ്ഥർ ഫോണിൻ്റെ ഉള്ളടക്കം ചോർത്തുകയോ രാഷ്ട്രീയ ആവശ്യങ്ങൾക്കായി ഉപയോഗിക്കുകയും ചെയ്തക്കാമെന്ന ആശങ്കയിലാണ് അൺലോക്ക് ചെയ്യാൻ വിസമ്മതിക്കുന്നതെന്ന് കെജ്‌രിവാളിൻ്റെ അഭിഭാഷകർ കോടതിയിൽ വാദിച്ചിരുന്നു. ഈ സാഹചര്യത്തിലാണ് Nextechno Gen-ൻ്റെ ഇഡിയുമായുള്ള ബന്ധം പുറത്തുവരുന്നതെന്ന് ദി ഹിന്ദു റിപ്പോർട്ട് ചെയ്യുന്നു.
ഡിവൈസ് ക്രാക്കിംഗ് സാങ്കേതികവിദ്യ, ഇന്ത്യയിൽ നടക്കുന്ന ഡിജിറ്റൽ നിരീക്ഷണത്തിന്റെ ഭാഗമായി മാറുന്നുണ്ടോ എന്ന ആശങ്കയും പുറത്തുവരുന്നുണ്ട്. ഉദാഹരണത്തിന്, ഇസ്രായേലി എൻഎസ്ഒ ഗ്രൂപ്പ് ടെക്നോളജീസ് സൃഷ്ടിച്ച പെഗാസസിലേക്ക് ഇൻ്റലിജൻസ് ബ്യൂറോയ്ക്ക് പ്രവേശനമുണ്ട്. ഡാറ്റ ചാരപ്പണി ചെയ്യാനും മൈക്രോഫോണും ക്യാമറ ഫീഡുകളും ആക്‌സസ് ചെയ്യാനും തുടങ്ങി സ്‌മാർട്ട്‌ഫോണുകളിലെ പോരായ്മകളെ പെഗാസസിന് ചൂഷണം ചെയ്യാൻ കഴിയും.
ഇന്ത്യയുൾപ്പെടെ വിവിധ രാജ്യങ്ങളിലെ അന്വേഷണ ഏജൻസികൾ അന്വേഷണത്തിനായി ഐഫോണുകൾ പോലുള്ള സുരക്ഷിത ഉപകരണങ്ങൾ അൺലോക്ക് ചെയ്യാനുള്ള വഴികൾ തേടിക്കൊണ്ടിരിക്കുകയാണ്. 2017ൽ ലഷ്‌കർ-ഇ-തൊയ്ബ ഓപ്പറേഷൻ കമാൻഡർ അബു ദുജാനയുടെ ഐഫോൺ അൺലോക്ക് ചെയ്യാൻ ഇന്ത്യ അമേരിക്കയുടെ സഹായം തേടിയിരുന്നു. സെലിബ്രൈറ്റ് ബ്രോഷറുകളുമായി ലിങ്ക് ചെയ്യുന്ന വെബ്‌സൈറ്റിൽ ഒരു വിഭാഗമുള്ള നെക്‌സ്‌ടെക്‌നോ ജെൻ, ഇഡിയെ മാത്രമല്ല, ബിഹാർ പോലീസ്, കേരള പോലീസ്, ഡൽഹിയിലെ ഫോറൻസിക് സയൻസ് ലബോറട്ടറി, ഇന്ത്യൻ ആർമി, കൊൽക്കത്ത പോലീസ്, എന്നിവരെയും ക്ലയൻ്റ് എന്ന നിലയിൽ പട്ടികപ്പെടുത്തുന്നു. ഇന്ത്യൻ അന്വേഷണ ഏജൻസികൾ ഇലക്ട്രോണിക് ഉപകരണങ്ങൾ ആക്‌സസ് ചെയ്യാൻ ഉപയോഗിക്കുന്ന ഹാക്കിംഗ് ടൂളുകൾ അവയുടെ ഉടമകൾ അൺലോക്ക് ചെയ്യുന്നതിൽ സഹകരിക്കാത്തപ്പോൾ സാധാരണയായി വെളിപ്പെടുത്താറില്ല. നിയമപ്രകാരം ആളുകൾക്ക് അവരുടെ ഉപകരണങ്ങൾക്ക് പാസ്‌വേഡുകൾ നൽകുന്നതിൽ നിന്ന് പൊതുവെ പരിരക്ഷയുണ്ടെങ്കിലും, അത്തരം വിവരങ്ങൾ കണ്ടെത്തുന്നതിൽ പോലീസിന് വിപുലമായ സാധ്യതയുണ്ടെന്ന് അഭിഭാഷകൻ പ്രസന്ന എസ് പറയുന്നു. എന്നിരുന്നാലും, ഒരു അന്വേഷണത്തിൽ വിവരങ്ങൾക്കായി ഇലക്ട്രോണിക് ഉപകരണങ്ങളിലൂടെ പോകുന്നതിനുള്ള പരിധി പരിമിതപ്പെടുത്തണമെന്ന് അദ്ദേഹം പറഞ്ഞു.
അതെ സമയം എൻഎസ്ഒ ഗ്രൂപ്പിൻ്റെ പെഗാസസ് മാൽവെയർ ഉൾപ്പെടെ, ഐഫോണിന് സുരക്ഷാ ഭീഷണിയുള്ളതായി ആപ്പിൾ മുന്നറിയിപ്പ് നൽകി. മറ്റ് 91 രാജ്യങ്ങൾക്കൊപ്പം ഇന്ത്യയിലെ ചില ഉപയോക്താക്കൾക്കും ആപ്പിൾ മുന്നറിയിപ്പ് നൽകിയിട്ടുണ്ട്. ഇന്ത്യയിലെ വിവിധ പാർട്ടികളിൽ നിന്നുള്ള രാഷ്ട്രീയ നേതാക്കൾക്കടക്കം സ്പൈവെയർ ആക്രമണം ഉണ്ടാകാൻ സാധ്യതയുള്ളതിനെക്കുറിച്ച് ആപ്പിൾ അടുത്തിടെ മുന്നറിയിപ്പ് നൽകിയിരുന്നു. ഈ ആക്രമണത്തിന് പിന്നിൽ ആരാണെന്ന് വ്യക്തമാക്കിയിട്ടില്ല. കഴിഞ്ഞ ഒക്ടോബറിൽ, കോൺഗ്രസ് പാർട്ടിയിൽ നിന്നുള്ള ശശി തരൂർ, ആം ആദ്മി പാർട്ടിയിൽ നിന്നുള്ള രാഘവ് ഛദ്ദ, ടിഎംസിയിൽ നിന്നുള്ള മഹുവ മൊയ്ത്ര തുടങ്ങിയ പ്രതിപക്ഷ നേതാക്കൾക്ക് സമാനമായ അറിയിപ്പുകൾ അയച്ചിരുന്നു, അവരുടെ ഐഫോണുകൾ ലക്ഷ്യം വച്ചുള്ള സർക്കാർ സ്പോൺസർ ചെയ്യുന്ന സ്പൈവെയർ ഭീഷണികളെക്കുറിച്ചാണ് മുന്നറിയിപ്പ് നൽകിയിരുന്നത്.
