21 സ്ഥലങ്ങളുടെ പട്ടികയില്‍ നിന്ന് ആദ്യ ഘട്ടത്തില്‍ പദ്ധതി നടപ്പിലാക്കുന്നതിനായി കോവളം, മുന്നാര്‍, ആലപ്പുഴ, കുമരകം, വയനാട്, ഫോര്‍ട്ട് കൊച്ചി, കൊല്ലം, തെക്കാടി, ബേക്കല്‍ എന്നീ ഒമ്പത് സ്ഥലങ്ങളാണ് തിരഞ്ഞെടുത്തിട്ടുള്ളത്.
വിനോദ സഞ്ചാരം കേരളത്തിന്റെ വികസന രംഗത്ത് വലിയ മുതല്‍ക്കൂട്ടാകാന്‍ കഴിയുന്ന വ്യവസായമാണ്. അതുകൊണ്ടുതന്നെ പ്രധാന ടൂറിസം കേന്ദ്രങ്ങള്‍ പ്ലാസ്റ്റിക് മാലിന്യരഹിതമാക്കി നിലനിര്‍ത്താനുള്ള ശ്രമത്തിലാണ് സര്‍ക്കാര്‍. അതിന്റെ ഭാഗമായി ‘ക്ലീന്‍ കേരള സംരംഭം’ ആരംഭിച്ചതായി കേരള ടൂറിസം മന്ത്രി കടകമ്പള്ളി സുരേന്ദ്രന്‍ അറിയിച്ചു. ടൂറിസം മേഖലയിലെ വിവിധ പങ്കാളികളുടെ സഹകരണത്തോടെ ഉത്തരവാദിത്ത ടൂറിസം മിഷന്റെ ഭാഗമായാണ് സംരംഭം നടപ്പാക്കുക.
പ്രത്യേകം തെരഞ്ഞെടുത്ത 21 സ്ഥലങ്ങളുടെ പട്ടികയില്‍ നിന്ന് ആദ്യ ഘട്ടത്തില്‍ പദ്ധതി നടപ്പിലാക്കുന്നതിനായി കോവളം, മുന്നാര്‍, ആലപ്പുഴ, കുമരകം, വയനാട്, ഫോര്‍ട്ട് കൊച്ചി, കൊല്ലം, തെക്കാടി, ബേക്കല്‍ എന്നീ ഒമ്പത് സ്ഥലങ്ങളാണ് തിരഞ്ഞെടുത്തിട്ടുള്ളത്. പരിസ്ഥിതി സൗഹാര്‍ദ്ദപരവും ഉത്തരവാദിത്തമുള്ളതുമായ ടൂറിസം പ്രവര്‍ത്തനങ്ങളുടെ കേന്ദ്രമാക്കി ഈ ടൂറിസ്റ്റ് കേന്ദ്രങ്ങളെ ഹരിത സര്‍ട്ടിഫിക്കേഷന്‍ പ്ലാറ്റ്ഫോമിലേക്ക് കൊണ്ടുവരും.
ഉത്തരവാദിത്ത ടൂറിസം (ആര്‍ടി) മിഷന്റെ ഭാഗമായി 15,515 യൂണിറ്റുകള്‍ പ്രവര്‍ത്തിക്കുന്നുണ്ട്. അടുത്ത ഘട്ടത്തില്‍ 50,000-ത്തോളം യൂണിറ്റുകള്‍ കൂടി രൂപം നല്‍കാന്‍ സര്‍ക്കാര്‍ ലക്ഷ്യമിടുന്നു. 2008 മുതല്‍ അടുത്ത 2018 വരെ 198 ആര്‍ടി യൂണിറ്റുകള്‍ മാത്രമേ ഉണ്ടായിരുന്നുള്ളൂ, രണ്ട് വര്‍ഷത്തിനുള്ളില്‍ ഇത് ഗണ്യമായി വര്‍ദ്ധിച്ചു. കോവളം, ഫോര്‍ട്ട് കൊച്ചി തുടങ്ങിയ സ്ഥലങ്ങളില്‍ വ്യക്തിഗതമായ ചില പ്രവര്‍ത്തനങ്ങള്‍ നടത്തുന്നുണ്ട്. എന്നാല്‍ സര്‍ക്കാര്‍, വ്യവസായം സ്ഥാപനങ്ങള്‍, പ്രാദേശിക സ്വയംഭരണ സ്ഥാപനങ്ങള്‍ എന്നിവയുമായി സഹകരിപ്പിച്ചുകൊണ്ട് അവയെ സ്ഥാപനവല്‍ക്കരിക്കേണ്ടതുണ്ടെന്ന് കേരള ടൂറിസം വകുപ്പ് അറിയിക്കുന്നു.
മാലിന്യ സംസ്‌കരണ സംവിധാനത്തിന് ശക്തമായ ഒരു സംരംഭം ആവശ്യമാണ്. അതിനാല്‍ മാലിന്യ നിര്‍മാര്‍ജന സംവിധാനത്തിനു പുറമെ 15 സ്ഥലങ്ങളില്‍ ലോകോത്തര ടോയ്ലറ്റുകളും കുടിവെള്ള സൗകര്യങ്ങളും സ്ഥാപിക്കും. അവ സ്വകാര്യ സ്ഥാപനങ്ങള്‍ പരിപാലിക്കുകയും ചെയ്യും.
Read More : ഇന്ത്യന്‍ സഞ്ചാരികള്‍ക്ക് ഫ്രീ വിസ നല്‍കാനൊരുങ്ങുന്ന ശ്രീലങ്കയുടെ ലക്ഷ്യം ഇതാണ്
