ഗാസയില്‍ സഹായമെത്തിക്കുന്നതില്‍ ഇസ്രയേല്‍ പരാജയപ്പെട്ടുവെന്ന് അമേരിക്ക
അമേരിക്കയുടെ കനത്ത സമ്മർദത്തിന് വഴങ്ങി, അടിസ്ഥാന സൗകര്യങ്ങൾ പോലുമില്ലാതെ യുദ്ധത്തിന്റെ ഭീകര കെടുതി അനുഭവിക്കുന്ന ഗാസയ്ക്ക് സഹായം വർദ്ധിപ്പിക്കുമെന്ന് ഇസ്രായേൽ വാഗ്ദാനം നൽകിയിരുന്നു. ജോ ബൈഡനും ബെഞ്ചമിൻ നെതന്യാഹുവും തമ്മിൽ ചർച്ചകൾ നടത്തി ആഴ്ചകൾ പിന്നുടുമ്പോഴും വാഗ്ദാനങ്ങൾ, വാഗ്‌ദനമായി നിലകൊള്ളുകയാണെന്ന ആശങ്ക പരക്കെ പങ്കുവക്കപ്പെടുന്നുണ്ട്. ഗാസയുടെ വടക്കൻ ഭാഗത്തുൾപ്പെടെ പട്ടിണി വ്യാപകമാണെന്ന് റിപ്പോർട്ടുകൾ പറയുന്നു.
ഒരാഴ്ച മുമ്പ് ജോ ബൈഡന് ബെഞ്ചമിൻ നെതന്യാഹു ഉറപ്പു നൽകിയ ഗാസയിലേക്കുള്ള സഹായ വാഗ്ദാനം ഇതുവരെ യാഥാർത്ഥ്യമാക്കിയിട്ടില്ലെന്ന് യുഎസ് പറയുന്നു. ഉപരോധം ഏർപ്പെടുത്തിയ തീരപ്രദേശങ്ങളിൽ പട്ടിണി പിടിമുറുക്കാൻ തുടങ്ങിയെന്ന് യുഎസ് എയ്ഡ് ചീഫ് സ്ഥിരീകരിച്ചു. ഗാസയിലേക്ക് സാധനങ്ങളുമായി കടക്കുന്ന ട്രക്കുകളുടെ എണ്ണത്തിൽ വർധനവുണ്ടായിട്ടുണ്ടെന്ന് ഇസ്രായേൽ അവകാശപ്പെടുന്നുണ്ട്. എന്നാൽ ഈ അവകാശവാദം ഐക്യരാഷ്ട്രസഭയുടെ രേഖകളുമായി പൊരുത്തപ്പെടുന്നില്ല. കൂടാതെ, ഈ പറയപ്പെടുന്ന വർദ്ധനവ് മുഴുവൻ ഗാസക്കും ഫലപ്രദമായി എത്തിയിട്ടില്ല. സഹായം കടൽമാർഗം ഗാസയിലെത്താൻ വടക്കുള്ള അഷ്‌ഡോദ് തുറമുഖം ഇസ്രായേൽ തുറക്കുമെന്ന് ബെഞ്ചമിൻ നെതന്യാഹു ജോ ബൈഡന് വാഗ്ദാനം ചെയ്തു. എന്നിരുന്നാലും, ഇസ്രായേലിൻ്റെ N12 ചാനൽ അനുസരിച്ച്, ഈ വാഗ്ദാനത്തിൽ ഒരു നടപടിയും ഉണ്ടായിട്ടില്ല. ഗസ്സയിലേക്കുള്ള കയറ്റുമതിക്കായി തുറമുഖം തുറക്കാൻ ഇസ്രായേൽ ഡിഫൻസ് ഫോഴ്‌സ് (ഐഡിഎഫ്), ഇസ്രായേൽ കോർഡിനേറ്റർ ഓഫ് ഗവൺമെൻ്റ് ആക്റ്റിവിറ്റീസ് (കോഗട്ട്), അഷ്‌ഡോദ് തുറമുഖ അധികൃതർ എന്നിവർക്ക് നിർദ്ദേശങ്ങളൊന്നും ലഭിച്ചിട്ടില്ലെന്ന് N12 റിപ്പോർട്ട് ചെയ്തു.
പട്ടിണി ഏറ്റവും രൂക്ഷമായി അനുഭവപ്പെടുന്ന വടക്കൻ ഗാസയിലേക്ക് ഒരു ക്രോസിംഗ് പോയിൻ്റ് തുറക്കുമെന്ന് ഇസ്രായേൽ വാഗ്ദാനം ചെയ്തിരുന്നു. അത് നിലവിലെ യുദ്ധത്തിന് മുമ്പുള്ള പ്രധാന അതിർത്തി പോയിൻ്റായിരുന്ന എറെസിലോ അല്ലെങ്കിൽ മറ്റൊരു പുതിയ സൈറ്റിലോ ആയിരിക്കുമെന്നാണ് വാഷിംഗ്ടണിനെ അറിയിച്ചിരുന്നത്. ബൈഡൻ-നെതന്യാഹു ചർച്ചക്ക് ആറ് ദിവസത്തിന് ശേഷം, പുതിയ ക്രോസിംഗിൻ്റെ നിർമ്മാണം ആരംഭിച്ചതായി പ്രതിരോധ മന്ത്രി യോവ് ഗാലൻ്റ് അറിയിച്ചിട്ടുണ്ട്. എന്നാൽ നിർമ്മാണ പ്രവർത്തനങ്ങൾക്ക് വേണ്ടി എത്ര സമയമെടുക്കുമെന്നതിൽ കൃത്യമായ വ്യക്തതയില്ല.
ഗാസയിലേക്ക് കൂടുതൽ സഹായം എത്തിക്കാൻ ഇസ്രായേൽ രണ്ട് നടപടികളായിരുന്നു സ്വീകരിക്കേണ്ടയിരുന്നത്. പക്ഷേ അവ ഇപ്പോഴും പുരോഗമിക്കുകയാണ്, എപ്പോൾ പൂർത്തിയാകും എന്നതിൽ കൃത്യതയില്ല. ഒരു ഏകോപന കേന്ദ്രം സ്ഥാപിക്കുക എന്നതാണ് ആദ്യ ഘട്ടം. ഏപ്രിലിൽ ബോംബെറിഞ്ഞ് ഏഴ് സഹായ തൊഴിലാളികളുടെ മരണത്തിന് ഇടയാക്കിയ സാഹചര്യങ്ങൾ ഒഴിവാക്കാനും സഹായ ദൗത്യങ്ങൾ സുരക്ഷിതമാണെന്ന് ഉറപ്പാക്കാൻ ഈ കേന്ദ്രത്തിൽ സഹായ ഏജൻസികളിലെ ഉദ്യോഗസ്ഥരും ഇസ്രായേലി കമാൻഡർമാരും ഒരുമിച്ച് പ്രവർത്തിക്കും. മറ്റൊരു ഘട്ടം ഒരു പുതിയ സുരക്ഷാ സ്ക്രീനിംഗ് സെൻ്റർ സൃഷ്ടിക്കുക എന്നതാണ്. വടക്കൻ ഗാസയിലേക്ക് അടിസ്ഥാന സഹായവുമായി പോകുന്ന ട്രക്കുകൾ കടക്കുന്നതിന് മുമ്പ് ഇസ്രായേൽ നിരീക്ഷകർ പരിശോധിക്കും. സഹായം സുരക്ഷിതമായും സുരക്ഷാ ആശങ്കകളുമില്ലാതെ ലക്ഷ്യസ്ഥാനത്ത് എത്തുന്നുവെന്ന് ഉറപ്പാക്കാനാണിത്.
തീരപ്രദേശത്ത് എത്തുന്ന ഭക്ഷണത്തിൻ്റെ അളവ് വരാനിരിക്കുന്ന ക്ഷാമം തടയാൻ ആവശ്യമായതിനേക്കാൾ വളരെ കുറവാണെന്ന് എയ്ഡ് ഉദ്യോഗസ്ഥർ പറയുന്നു, പ്രത്യേകിച്ച് വടക്കൻ ഗാസയിൽ. ബുധനാഴ്ച, യുഎസ് ഹ്യൂമാനിറ്റേറിയൻ ആൻഡ് ഡെവലപ്‌മെൻ്റ് ഏജൻസിയായ യുഎസ്എഐഡിയുടെ തലവനായ സാമന്ത പവർ, ഗാസയുടെ ചില ഭാഗങ്ങളിലെങ്കിലും ഇതിനകം പട്ടിണി പിടിപെട്ടിട്ടുണ്ടെന്ന് പരസ്യമായി സ്ഥിരീകരിച്ചു. ഇക്കാര്യം സ്ഥീരികരിക്കുന്ന ആദ്യ യു എസ് ഉദ്യോഗസ്ഥയാണ് സാമന്ത പവർ. ഏപ്രിലിനുംമെയ് പകുതിയ്ക്കും ഇടയിൽ ഒരു ക്ഷാമം ഉണ്ടാകാനിടയുണ്ടെന്ന് മാർച്ച് പകുതിയോടെ ഭക്ഷ്യസുരക്ഷ വിദഗ്ധർ നടത്തിയ വിലയിരുത്തൽ തൻ്റെ ഉദ്യോഗസ്ഥർ വിശകലനം ചെയ്തതായും പവർ അറിയിച്ചു.
ഇൻ്റഗ്രേറ്റഡ് ഫുഡ് സെക്യൂരിറ്റി ഫേസ് ക്ലാസിഫിക്കേഷൻ (ഐപിസി) എന്നറിയപ്പെടുന്ന സ്വതന്ത്ര വിലയിരുത്തൽ മൂന്ന് പ്രധാന മാനദണ്ഡങ്ങൾ ഉപയോഗിച്ചാണ് ഗാസയിലെ പട്ടിണി സ്ഥിരീകരിച്ചത്. തീർത്തും ഭക്ഷണത്തിൻ്റെ അഭാവം നേരിടുന്ന കുടുംബങ്ങളുടെ എണ്ണം, കടുത്ത പോഷകാഹാരക്കുറവ് അനുഭവിക്കുന്ന കുട്ടികളുടെ എണ്ണം, പട്ടിണി മൂലമുള്ള മുതിർന്നവരുടെ മരണങ്ങളുടെ എണ്ണം തുടങ്ങിയ മാനദണ്ഡങ്ങളായിരുന്നു വിശകലനം ചെയ്‍തത്. മാർച്ചിലെ ഐപിസി റിപ്പോർട്ടിൽ മൂന്ന് മാനദണ്ഡങ്ങളിൽ രണ്ടെണ്ണം ഇതിനകം കവിഞ്ഞതായി കണ്ടെത്തി.
