ബിജെപിയുടെ പ്രചരണ ആയുധമായി ദ്വീപ് മാറുന്നത് എന്തുകൊണ്ട്?
കച്ചത്തീവ് ദ്വീപ് ശ്രീലങ്കക്ക് വിട്ടുകൊടുത്ത കോൺഗ്രസിൻ്റെ തീരുമാനത്തെ ശക്തമായി വിമർശിച്ച് പ്രധാനമന്ത്രി നരേന്ദ്ര മോദി വീണ്ടും രംഗത്തെത്തി.
കച്ചത്തീവ് കോൺഗ്രസ് എങ്ങനെയാണ് കൈ വിട്ടു കളഞ്ഞതെന്ന് സൂചിപ്പിക്കുന്ന പുതിയ വസ്തുതകൾ ഞെട്ടിക്കുന്നതാണ്. ഇത് ഓരോ ഇന്ത്യക്കാരനെയും രോഷാകുലരാക്കുന്നുണ്ട്.ഞങ്ങൾക്ക് ഒരിക്കലും കോൺഗ്രസിനെ വിശ്വസിക്കാൻ കഴിയില്ല.” പ്രധാനമന്ത്രി എക്‌സിൽ പോസ്റ്റ് ചെയ്തു.
ജനവാസമില്ലാത്ത ചെറിയ ദ്വീപിന് കോൺഗ്രസ് ഒരിക്കലും വലിയ പ്രാധാന്യം നൽകിയിട്ടില്ലെന്ന് ബിജെപി തമിഴ്നാട് അധ്യക്ഷൻ കെ അണ്ണാമലൈക്ക് ലഭിച്ച രേഖകൾ സൂചിപ്പിക്കുന്നതിന് പിന്നാലെയാണ് പ്രധാനമന്ത്രിയുടെ പോസ്റ്റ്. മുൻ പ്രധാനമന്ത്രി ജവഹർലാൽ നെഹ്‌റു പോലും ഒരിക്കൽ ദ്വീപിന് മേലുള്ള അവകാശവാദങ്ങൾ ഉപേക്ഷിക്കുന്നതിൽ വിരോധമില്ലെന്ന് പറഞ്ഞതായി റിപ്പോർട്ട്‌ സൂചിപ്പിക്കുന്നു.
ഈ വിഷയം പുതുതായി രൂപപ്പെട്ടതല്ല. 1974-ൽ ഇന്ദിരാഗാന്ധി പ്രധാനമന്ത്രിയായിരുന്ന കാലത്ത് ഇന്ത്യ കച്ചത്തീവിനു മേലുള്ള അവകാശവാദം ഉപേക്ഷിച്ച സാഹചര്യങ്ങൾ രേഖപ്പെടുത്തപ്പെട്ടിട്ടുണ്ട്. എന്നിരുന്നാലും, ബിജെപിയുടെ തമിഴ്നാട് പ്രചാരണം സംസ്ഥാനത്തെ ഏറ്റവും ചൂടേറിയ രാഷ്ട്രീയ വിഷയങ്ങളിൽ ഒന്നായി മാറിയിരിക്കുകയാണ്. കച്ചത്തീവ് എങ്ങനെയാണ് തമിഴ് നാട് രാഷ്ട്രീയത്തിൽ പ്രധനമായി മാറുന്നത്.
കച്ചത്തീവ് ദ്വീപ് എവിടെയാണ്?
ഇന്ത്യയ്ക്കും ശ്രീലങ്കയ്ക്കും ഇടയിലുള്ള പാക്ക് കടലിടുക്കിലെ 285 ഏക്കർ വിസ്തൃതിയുള്ള ജനവാസമില്ലാത്ത മേഖലയാണ് കച്ചത്തീവ്. 1.6 കിലോമീറ്ററിൽ കൂടുതൽ നീളമില്ലാത്ത ദ്വീപിന് 300 മീറ്ററിൽ കൂടുതൽ വീതിയുണ്ട്.
ഇന്ത്യൻ തീരത്ത് നിന്ന് ഏകദേശം 33 കിലോമീറ്റർ മാറി രാമേശ്വരത്തിന് വടക്ക് കിഴക്കായാണ് ദ്വീപ് സ്ഥിതി ചെയ്യുന്നത്. ശ്രീലങ്കയുടെ വടക്കേ അറ്റത്ത് ജാഫ്‌നയിൽ നിന്ന് ഏകദേശം 62 കിലോമീറ്റർ തെക്ക് പടിഞ്ഞാറായും ശ്രീലങ്കയുടെ ജനവാസമുള്ള ഡെൽഫ് ദ്വീപിൽ നിന്ന് 24 കിലോമീറ്റർ അകലെയുമാണ് സ്ഥിതി ചെയ്യുന്നത്.
ദ്വീപിലെ ഏക ഘടന ഇരുപതാം നൂറ്റാണ്ടിൻ്റെ ആദ്യകാല കത്തോലിക്കാ ദേവാലയമായ സെൻ്റ് ആൻ്റണീസ് പള്ളിയാണ്. വാർഷികആഘോഷ സമയങ്ങളിൽ, ഇന്ത്യയിൽ നിന്നും ശ്രീലങ്കയിൽ നിന്നുമുള്ള ക്രിസ്ത്യൻ പുരോഹിതന്മാർ പള്ളിയിൽ പ്രാർത്ഥന നടത്തും.
ഇന്ത്യയിൽ നിന്നും ശ്രീലങ്കയിൽ നിന്നുമുള്ള ഭക്തരും തീർത്ഥാടനം നടത്താറുണ്ട്. 2023-ൽ 2,500 പേരാണ് രാമേശ്വരത്ത് നിന്ന് കച്ചത്തീവിലേക്ക് യാത്ര ചെയ്തത്. കുടിവെള്ള സ്രോതസ്സില്ലാത്ത ദ്വീപിൽ സ്ഥിരതാമസ യോഗ്യമല്ല.
എന്താണ് ദ്വീപിൻ്റെ ചരിത്രം ?
14 നൂറ്റാണ്ടിലെ അഗ്നിപർവ്വത സ്‌ഫോടനത്തിൻ്റെ ഫലമായാണ് ദ്വീപ് രൂപം കൊള്ളുന്നത്. അതുകൊണ്ട് തന്നെ ഭൂമിശാസ്ത്രപരമായ സമയക്രമത്തിൽ കച്ചത്തീവ് താരതമ്യേന പുതിയ ഇടമാണ്.
മധ്യകാലഘട്ടത്തിൽ, ശ്രീലങ്കയിലെ ജാഫ്ന സാമ്രാജ്യത്തിൻ്റെ നിയന്ത്രണത്തിലായിരുന്നു ദ്വീപ്.പിന്നീട് പതിനേഴാം നൂറ്റാണ്ടിൽ രാമേശ്വരത്ത് നിന്ന് ഏകദേശം 55 കിലോമീറ്റർ വടക്കുപടിഞ്ഞാറായി രാമനാഥപുരം കേന്ദ്രീകരിച്ച് രാമനാട് ജമീന്ദാരിക്ക് നിയന്ത്രണം കൈമാറി.
ബ്രിട്ടീഷ് ഭരണകാലത്ത് ഇത് മദ്രാസ് പ്രസിഡൻസിയുടെ ഭാഗമായി. എന്നാൽ 1921-ൽ, മീൻപിടിത്തത്തിൻ്റെ അതിരുകൾ നിർണയിക്കുന്നതിനായി, അന്നത്തെ ബ്രിട്ടീഷ് കോളനികളായിരുന്ന ഇന്ത്യയും ശ്രീലങ്കയും കച്ചത്തീവിൽ അവകാശവാദമുന്നയിച്ചു. ഒരു സർവേ ശ്രീലങ്കക്കാണ് അവകാശമെന്ന് ചൂണ്ടികാണിച്ചു. എന്നാൽ ദ്വീപിൻ്റെ ഉടമസ്ഥാവകാശം രാംനാട് രാജ്യത്തിനാണെന്ന് ചൂണ്ടിക്കാട്ടി ഇന്ത്യയിൽ നിന്നുള്ള ഒരു ബ്രിട്ടീഷ് പ്രതിനിധി ഇതിനെ വെല്ലുവിളിച്ചു. ഈ തർക്കം 1974 വരെ പരിഹരിക്കപ്പെട്ടില്ല.
എന്താണ് കരാർ?
1974-ൽ ഇന്ദിരാഗാന്ധി ഇന്ത്യയ്ക്കും ശ്രീലങ്കയ്ക്കും ഇടയിലുള്ള സമുദ്രാതിർത്തി പരിഹരിക്കാൻ ശ്രമിച്ചിരുന്നു.
‘ഇന്തോ-ശ്രീലങ്കൻ മാരിടൈം കരാർ’ എന്നറിയപ്പെടുന്ന ഈ ഒത്തുതീർപ്പിൻ്റെ ഭാഗമായി ഇന്ദിരാഗാന്ധി കച്ചത്തീവിനെ ശ്രീലങ്കയ്ക്ക് വിട്ടുകൊടുത്തു. ആ സമയത്ത്, ദ്വീപിന് തന്ത്രപരമായ മൂല്യം കുറവാണെന്നും ദ്വീപിന് മേലുള്ള ഇന്ത്യയുടെ അവകാശവാദം അവസാനിപ്പിക്കുന്നത് തെക്കൻ അയൽക്കാരുമായുള്ള ബന്ധം കൂടുതൽ ആഴത്തിലാക്കുമെന്നും ഇന്ദിരഗാന്ധി കരുതി.
മാത്രമല്ല, കരാർ പ്രകാരം ഇന്ത്യൻ മത്സ്യത്തൊഴിലാളികൾക്ക് കച്ചത്തീവിലേക്ക് ഇതുവരെ പ്രവേശിക്കാൻ അനുവാദമുണ്ടായിരുന്നു. നിർഭാഗ്യവശാൽ, മത്സ്യബന്ധന അവകാശത്തിൻ്റെ പ്രശ്നം കരാറിലൂടെ പരിഹരിക്കപ്പെട്ടില്ല. കച്ചത്തീവിലേക്ക് പ്രവേശിക്കാനുള്ള ഇന്ത്യൻ മത്സ്യത്തൊഴിലാളികളുടെ അവകാശം “വിശ്രമിക്കുന്നതിനും വല ഉണക്കുന്നതിനും വിസയില്ലാതെ കത്തോലിക്കാ ദേവാലയം സന്ദർശിക്കുന്നതിനും” മാത്രമായി പരിമിതപ്പെടുത്തിയതായി ശ്രീലങ്കയും വ്യാഖ്യാനിച്ചു.
1976-ലെ മറ്റൊരു ഉടമ്പടി, ഇന്ത്യയിലെ അടിയന്തരാവസ്ഥയുടെ കാലത്ത്, ഒരു രാജ്യവും മറ്റേത് രാജ്യത്തിൻറെ പ്രത്യേക സാമ്പത്തിക മേഖലയിൽ മത്സ്യബന്ധനം നടത്തുന്നതിൽ നിന്ന് വിലക്കിയിരുന്നു. വീണ്ടും, മത്സ്യബന്ധന അവകാശവുമായി ബന്ധപ്പെട്ട് ഒരു പരിധിവരെ അനിശ്ചിതത്വം നിലനിന്നിരുന്നു.
ശ്രീലങ്കൻ ആഭ്യന്തരയുദ്ധം കച്ചത്തീവിനെ എങ്ങനെ ബാധിച്ചു?
1983 നും 2009 നും ഇടയിൽ, ശ്രീലങ്കൻ ആഭ്യന്തരയുദ്ധം രൂക്ഷമായതിനാൽ അതിർത്തി തർക്കം വലിയ പ്രാധാന്യമില്ലാതെയായി.ശ്രീലങ്കൻ നാവിക സേന ജാഫ്ന കേന്ദ്രീകരിച്ച് എൽ.ടി.ടി.ഇയുടെ വിതരണ ലൈനുകൾ വിച്ഛേദിക്കുക എന്ന ദൗത്യത്തിൽ മുഴുകിയിരിക്കെ, ഇന്ത്യൻ മത്സ്യത്തൊഴിലാളികൾ ശ്രീലങ്കൻ കടലിലേക്ക് കടന്നുകയറുന്നത് സാധാരണമായിരുന്നു. വലിയ ഇന്ത്യൻ ട്രോളറുകൾ അമിതമായി മീൻ പിടിക്കാൻ മാത്രമല്ല, ശ്രീലങ്കൻ മത്സ്യബന്ധന വലകൾക്കും ബോട്ടുകൾക്കും കേടുപാടുകൾ വരുത്തിയിരുന്നു.
2009-ൽ, എൽ.ടി.ടി.ഇ.യുമായുള്ള യുദ്ധം അവസാനിച്ചതോടെ കാര്യങ്ങൾ നാടകീയമായി മാറി. കൊളംബോ സമുദ്ര പ്രതിരോധം ശക്തമാക്കി, ഇന്ത്യൻ മത്സ്യത്തൊഴിലാളികളിലേക്ക് ശ്രദ്ധ കേന്ദ്രീകരിച്ചു. ഇന്ത്യൻ ഭാഗത്ത് സമുദ്രവിഭവങ്ങളുടെ ശോഷണം നേരിടുന്നതിനാൽ, അവർ വർഷങ്ങളായി ചെയ്യുന്നതുപോലെ ശ്രീലങ്കൻ കടലിലേക്ക് ഇടയ്ക്കിടെ പ്രവേശിച്ചിരുന്നു, എന്നാൽ ഒടുവിൽ അനന്തരഫലങ്ങൾ നേരിടാൻ തുടങ്ങി.
ഇന്നുവരെ, ശ്രീലങ്കൻ നാവികസേന ഇന്ത്യൻ മത്സ്യത്തൊഴിലാളികളെ പതിവായി അറസ്റ്റുചെയ്യുന്നുണ്ട്. കൂടാതെ കസ്റ്റഡി പീഡനവും മരണവും സംബന്ധിച്ച് നിരവധി ആരോപണങ്ങളും ഉയർന്നിട്ടുണ്ട്. ഓരോ തവണയും ഇത്തരമൊരു സംഭവം നടക്കുമ്പോൾ കച്ചത്തീവിൻ്റെ ആവശ്യം വീണ്ടും ഉയരുകയാണ്.
കച്ചത്തീവിനെക്കുറിച്ച് തമിഴ്നാടിൻ്റെ നിലപാട് എന്താണ്?
തമിഴ്നാട് സംസ്ഥാന അസംബ്ലിയുമായി ആലോചിക്കാതെയാണ് കച്ചത്തീവ് ശ്രീലങ്കയ്ക്ക് വിട്ടുകൊടുത്തത്. ആ സമയത്ത് തന്നെ, ദ്വീപിന് മേലുള്ള രാംനാട് ജമീന്ദാരിയുടെ ചരിത്രപരമായ നിയന്ത്രണവും ഇന്ത്യൻ തമിഴ് മത്സ്യത്തൊഴിലാളികളുടെ പരമ്പരാഗത മത്സ്യബന്ധന അവകാശവും ചൂണ്ടിക്കാട്ടി ഇന്ദിരാഗാന്ധിയുടെ നീക്കത്തിനെതിരെ ശക്തമായ പ്രതിഷേധം ഉയർന്നിരുന്നു.
1991-ൽ, ശ്രീലങ്കൻ ആഭ്യന്തരയുദ്ധത്തിൽ ഇന്ത്യയുടെ വിനാശകരമായ ഇടപെടലിനെത്തുടർന്ന്, തമിഴ്നാട് നിയമസഭ വീണ്ടും കച്ചത്തീവ് വീണ്ടെടുക്കാനും തമിഴ് മത്സ്യത്തൊഴിലാളികളുടെ മത്സ്യബന്ധന അവകാശം പുനഃസ്ഥാപിക്കാനും ആവശ്യപ്പെട്ടു. അതിനുശേഷം തമിഴ് രാഷ്ട്രീയത്തിൽ കച്ചത്തീവ് വീണ്ടും വീണ്ടും ഉയർന്നുവരുന്നു.
2008ൽ, അന്നത്തെ എഐഎഡിഎംകെ അധ്യക്ഷ അന്തരിച്ച ജെ ജയലളിത, ഭരണഘടനാ ഭേദഗതിയില്ലാതെ മറ്റൊരു രാജ്യത്തിന് കച്ചത്തീവ് വിട്ടുനൽകാൻ കഴിയില്ലെന്ന് ചൂണ്ടിക്കാട്ടി കോടതിയിൽ ഹർജി നൽകി. 1974ലെ കരാർ ഇന്ത്യൻ മത്സ്യത്തൊഴിലാളികളുടെ പരമ്പരാഗത മത്സ്യബന്ധന അവകാശങ്ങളെയും ഉപജീവനത്തെയും ബാധിച്ചുവെന്ന് ഹർജിയിൽ വാദിച്ചു.
2011-ൽ മുഖ്യമന്ത്രിയായ ശേഷം, അവർ സംസ്ഥാന അസംബ്ലിയിൽ ഒരു പ്രമേയം അവതരിപ്പിച്ചു, 2012-ൽ, ശ്രീലങ്കയിൽ നിന്ന് ഇന്ത്യൻ മത്സ്യത്തൊഴിലാളികളെ അറസ്റ്റ് ചെയ്യുന്നതിൻ്റെ പശ്ചാത്തലത്തിൽ തൻ്റെ ഹർജി വേഗത്തിലാക്കണമെന്ന് ആവശ്യപ്പെട്ട് സുപ്രീം കോടതിയെയും സമീപിച്ചു.
ശ്രീലങ്കൻ പ്രധാനമന്ത്രി റനിൽ വിക്രമസിംഗെയുടെ ഇന്ത്യാ സന്ദർശനത്തിന് മുന്നോടിയായി കഴിഞ്ഞ വർഷം തമിഴ്നാട് മുഖ്യമന്ത്രിയും ഡിഎംകെ നേതാവുമായ എംകെ സ്റ്റാലിൻ പ്രധാനമന്ത്രി നരേന്ദ്ര മോദിക്ക് കത്തയച്ചിരുന്നു, കച്ചത്തീവ് വിഷയം ഉൾപ്പെടെയുള്ള പ്രധാന വിഷയങ്ങൾ പ്രധാനമന്ത്രിയുമായി ചർച്ച ചെയ്യണമെന്ന് ആവശ്യവും ഉന്നയിച്ചിരുന്നു.
“തമിഴ്നാട് മത്സ്യത്തൊഴിലാളികൾക്ക് സമാധാനപരമായ ജീവിതം നയിക്കുന്നതിന്” കച്ചത്തീവ് വീണ്ടെടുക്കുന്നതിനായി 2006-ൽ അന്നത്തെ പ്രധാനമന്ത്രിയോട് അഭ്യർത്ഥിച്ചതുൾപ്പെടെ മുൻ മുഖ്യമന്ത്രി എം കരുണാനിധിയുടെ ശ്രമങ്ങളും സ്റ്റാലിൻ പരാമർശിച്ചു.
എന്നിരുന്നാലും, കച്ചത്തീവിലെ കേന്ദ്രസർക്കാരിൻ്റെ നിലപാടിൽ വലിയ മാറ്റമില്ല. ദ്വീപ് എല്ലായ്പ്പോഴും തർക്കത്തിലായതിനാൽ, “ഇന്ത്യയുടെ ഒരു പ്രദേശവും വിട്ടുകൊടുക്കുകയോ പരമാധികാരം വിട്ടുകൊടുക്കുകയോ ചെയ്തിട്ടില്ല” എന്നാണ് വാദം. ബി.ജെ.പി, പ്രത്യേകിച്ച് പാർട്ടിയുടെ തമിഴ്നാട് ഘടകം, ഇന്ത്യക്ക് വേണ്ടി കച്ചത്തീവ് വീണ്ടെടുക്കണമെന്ന ആവശ്യത്തിൽ ശബ്ദമുയർത്തുമ്പോൾ, നരേന്ദ്ര മോദി സർക്കാർ പോലും തമിഴ് രാഷ്ട്രീയക്കാരുടെ ആവശ്യങ്ങളിൽ പ്രവർത്തിക്കാൻ കാര്യമായൊന്നും ചെയ്തിട്ടില്ല
അന്നത്തെ അറ്റോർണി ജനറൽ മുകുൾ റോത്തഗി 2014-ൽ സുപ്രീം കോടതിയിൽ പറഞ്ഞിരുന്നു: “1974 ലെ ഒരു കരാറിലൂടെയാണ് കച്ചത്തീവ് ശ്രീലങ്കയിലേക്ക് പോയത്. ഇന്ന് അത് എങ്ങനെ തിരിച്ചെടുക്കാൻ കഴിയും? നിങ്ങൾക്ക് കച്ചത്തീവ് തിരിച്ചുകിട്ടണമെങ്കിൽ അത് തിരിച്ചുപിടിക്കാൻ നിങ്ങൾ യുദ്ധം ചെയ്യേണ്ടിവരും.”
