കനേഡിയന്‍ കുടിയേറ്റ നയത്തില്‍ സര്‍ക്കാര്‍ ഇളവ് വരുത്തുന്നത് രണ്ടാം ലോക മഹായുദ്ധത്തിന് ശേഷമാണ്
തൊഴിലിനും പഠനത്തിനുമായി ഇന്ത്യയില്‍ നിന്ന് യൂറോപ്പ്യന്‍ രാജ്യങ്ങളിലേക്ക് കുടിയേറുന്നവര്‍ കൂടുതലായും തെരഞ്ഞെടുക്കുന്നത് കാനഡയാണ്. ഇതില്‍ ഭൂരിപക്ഷവും പഞ്ചാബില്‍ നിന്നുള്ള സിഖ് ജനതയാണ്. 2021ലെ കനേഡിയന്‍ സെന്‍സസ് പ്രകാരം രാജ്യത്തെ ജനസംഖ്യയുടെ 2.1% സിഖുകാരാണ്. ഇന്ത്യയ്ക്ക് പുറത്ത് ഏറ്റവും കൂടുതല്‍ സിഖ് ജനസംഖ്യയുള്ളതും കാനഡയിലാണ്. സിഖുകാരുടെ കാനഡയിലേക്കുള്ള കുടിയേറ്റത്തിന് ഒരു നൂറ്റാണ്ടിന്റെ പഴക്കമുണ്ട്.
കാനഡയില്‍ ആദ്യമായി എത്തിയ സിഖുകാര്‍ ആരാണ്? എന്തെല്ലാം വെല്ലുവിളികളാണ് അവര്‍ നേരിടേണ്ടി വന്നത്?എന്തുകൊണ്ടാണ് സിഖുകാര്‍ കാനഡയിലേക്ക് മാറാന്‍ തുടങ്ങിയത്? തുടങ്ങിയ ചോദ്യങ്ങള്‍ വിശകലനം ചെയ്തുള്ള ഒരു റിപ്പോര്‍ട്ട് ദ ഇന്ത്യന്‍ എക്‌സ്പ്രസ്സ് പ്രസിദ്ധീകരിച്ചിട്ടുണ്ട്.
ബ്രിട്ടീഷ് സാമ്രാജ്യത്തിനായുള്ള സായുധ സേവനങ്ങളില്‍ ഏര്‍പ്പെട്ടിരുന്ന സിഖ് ജനത 19-ആം നൂറ്റാണ്ടിന്റെ അവസാനത്തോടെയാണ് വിദേശത്തേക്ക് കുടിയേറാന്‍ തുടങ്ങിയതെന്ന് ലണ്ടന്‍ യൂണിവേഴ്സിറ്റി സ്‌കൂള്‍ ഓഫ് ഓറിയന്റല്‍ ആന്‍ഡ് ആഫ്രിക്കന്‍ സ്റ്റഡീസിലെ എമെരിറ്റസ് പ്രൊഫസറായ ഗുര്‍ഹര്‍പാല്‍ സിംഗ് ന്യൂയോര്‍ക്കര്‍ മാസികയ്ക്ക് നല്‍കിയ അഭിമുഖത്തില്‍ പറയുന്നുണ്ട്.
കാനഡയിലേക്ക് സിഖുകാര്‍ ആദ്യമായി എത്തുന്നത് 1897-ലെ വിക്ടോറിയ രാജ്ഞിയുടെ വജ്രജൂബിലിയോടെയാണ്. ജൂബിലി ആഘോഷിക്കാന്‍ പോകുന്ന ചൈനീസ്, ജാപ്പനീസ് സൈനികര്‍ ഉള്‍പ്പെട്ട ഹോങ്കോംഗ് റെജിമെന്റിന്റെ ഭാഗമായി വാന്‍കൂവറില്‍ നിന്നെത്തിയ സൈനികരില്‍ ഒരാളായിരുന്ന കെസൂര്‍ സിംഗാണ് കാനഡയിലെത്തിയ ആദ്യ സിഖ് വംശജന്‍. ബ്രിട്ടീഷ് ഇന്ത്യ ആര്‍മിയിടെ ഫ്രോണ്ടിയര്‍ ഫോഴ്സിലെ 25-ആം കുതിരപ്പടയുടെ റിസാള്‍ദാര്‍ മേജറായിരുന്ന കെസൂര്‍ സിംഗിനെയാണ് ആദ്യത്തെ സിഖ് കുടിയേറ്റക്കാരനായി കണക്കാക്കുന്നത്.
1900-കളോടെയാണ് കാനഡയിലേക്കുള്ള സിഖ് കുടിയേറ്റത്തിന്റെ ആദ്യ തരംഗം ആരംഭിക്കുന്നത്. തടി വ്യാപരത്തിനായി ബ്രിട്ടീഷ് കൊളംബിയിലേക്കും നിര്‍മ്മാണ തൊഴിലുകള്‍ക്കായി സെന്‍ട്രല്‍ കാനഡയില്‍ സ്ഥിതി ചെയുന്ന ഒന്റാറിയോയിലേക്കും കുടിയേറിയവരായിരുന്നു ഇവര്‍.
5,000-ത്തില്‍ കുറയാത്ത സിഖുകാര്‍ ഈ കാലത്ത് കുടിയേറ്റം നടത്തിയിട്ടുണ്ട്. സ്ഥിരതാമസത്തിനല്ലാതെ തൊഴില്‍ തേടിയെത്തിയ പുരുഷന്മാരായിരുന്നു ഇവരില്‍ സിംഹഭാഗവും.
മെല്‍വിന്‍ എംബര്‍, കരോള്‍ ആര്‍ എംബര്‍, ഇയാന്‍ സ്‌കോഗാര്‍ഡ് എന്നിവര്‍ എഡിറ്റ് ചെയ്ത ‘എന്‍സൈക്ലോപീഡിയ ഓഫ് ഡയസ്പോറസ്: ഇമിഗ്രന്റ് ആന്‍ഡ് റെഫ്യൂജി കള്‍ച്ചേഴ്സ് എറൗണ്ട് ദ വേള്‍ഡ്’ പറയുന്നത് പ്രകാരം അഞ്ചു വര്‍ഷത്തിന് കൂടുതല്‍ ഇവര്‍ കാനഡയില്‍ തങ്ങിയിരുന്നില്ല. അവരുടെ സമ്പാദ്യം കഴിയുന്നത്ര നാട്ടിലേക്ക് അയക്കാനുള്ള ഉദ്ദേശത്തോടെ കുടിയേറ്റം നടത്തിയവരായിരുന്നു ഇവര്‍.
കുടിയേറ്റക്കാര്‍ക്ക് എളുപ്പത്തില്‍ കാനഡയില്‍ ജോലി ലഭിച്ചിരുന്നു. എന്നാല്‍ കാനേഡിയന്‍ പൗരന്മാരുടെ ജോലി സാധ്യതകള്‍ക്ക് വിള്ളല്‍ വീഴുമെന്ന തദ്ദേശിയരുടെ ഭയം കുടിയേറ്റക്കാരുടെ സ്ഥിതി മോശമാക്കി. വംശീയവും സാംസ്‌കാരികവുമായ മുന്‍വിധികളും ആദ്യകാലങ്ങളില്‍ സിഖുകാര്‍ക്ക് അഭിമുഖീകരിക്കേണ്ടി വന്നിട്ടുണ്ട്. കൂടുതല്‍ കൂടുതല്‍ സിഖുകാര്‍ രാജ്യത്ത് എത്തിത്തുടങ്ങിയതോടെ സ്ഥിതി വഷളായിക്കൊണ്ടിരുന്നു.
പൊതുജന സമ്മര്‍ദ്ദം വര്‍ദ്ധിച്ചതോടെ കര്‍ശനമായ നിയന്ത്രണങ്ങളോടെ കുടിയേറ്റം അവസാനിപ്പിക്കാനും കനേഡിയന്‍ സര്‍ക്കാര്‍ നിര്‍ബന്ധിതരായി. കൂടാതെ കാനഡയിലെത്തുന്ന ഏഷ്യന്‍ കുടിയേറ്റക്കാര്‍ 200 ഡോളര്‍ കയ്യില്‍ കരുതേണ്ടിയിരുന്നു. ഇത് ഏഷ്യന്‍ കുടിയേറ്റക്കാരെ മറ്റുള്ളവരില്‍ നിന്ന് വ്യത്യസ്തരാക്കുന്നതിനായി ഉപകരിച്ചുവെന്ന് ‘ദി ഇന്ത്യന്‍ ഡയസ്പോറ ഇന്‍ കാനഡ: ലുക്കിംഗ് ബാക്ക് ആന്‍ഡ് അഹെഡ്’ എന്ന ലേഖനത്തില്‍ നളിനികാന്ത് ഝാ എഴുതിയിരുന്നു. കൂടാതെ, സ്വന്തം രാജ്യത്ത് നിന്ന് നേരിട്ട് യാത്ര ചെയ്താല്‍ മാത്രമേ അവര്‍ക്ക് കാനഡയിലേക്ക് എത്താന്‍ അനുവാദമുണ്ടായിരുന്നുള്ളു. തത്ഫലമായി, ഇന്ത്യയില്‍ നിന്നുള്ള കാനഡ കുടിയേറ്റം 1908-ന് ശേഷം ഗണ്യമായി കുറഞ്ഞു. 1907-08 കാലത്ത് 2,500 ആയിരുന്നത്, പ്രതിവര്‍ഷം ഏതാനും ഡസന്‍ മാത്രമയെന്ന് ലേഖനം പറയുന്നു.
1914-ല്‍, കൊമഗത മാരു എന്നറിയപ്പെടുന്ന ഒരു ജാപ്പനീസ് ആവിക്കപ്പല്‍ വാന്‍കൂവറിന്റെ തീരത്തെത്തി. 376 ദക്ഷിണേഷ്യന്‍ യാത്രക്കാരാണ് വിമാനത്തില്‍ ഉണ്ടായിരുന്നത്. അവരില്‍ ഭൂരിഭാഗവും സിഖുകാരായിരുന്നു. കുടിയേറ്റക്കാരെ ഏകദേശം രണ്ട് മാസത്തോളം കപ്പലില്‍ തടഞ്ഞുവച്ചു. തുടര്‍ന്ന് കനേഡിയന്‍ കടലില്‍ നിന്ന് അകമ്പടിയായി ഏഷ്യയിലേക്ക് തിരിച്ചയച്ചു. കോമാഗത മാരു എന്ന പേരില്‍ പിന്നീടറിയപ്പെട്ട ഈ സംഭവം നടക്കുന്നത് ഈ സമയങ്ങളിലാണ്. കനേഡിയന്‍ മ്യൂസിയം ഓഫ് ഹ്യൂമന്‍ റൈറ്റ്സ് പറയുന്നതനുസരിച്ച്, കപ്പല്‍ ഇന്ത്യയിലെത്തിയപ്പോള്‍ വിപ്ലവകാരികളാണെന്ന് ഉദ്യോഗസ്ഥര്‍ സംശയിച്ചതോടെ ബ്രിട്ടീഷ് അധികൃതരും യാത്രക്കാരും തമ്മില്‍ വാക്കേറ്റമുണ്ടായി. തര്‍ക്കം അവസാനിച്ചപ്പോള്‍, ’16 യാത്രക്കാര്‍ ഉള്‍പ്പെടെ 22 പേര്‍ മരിച്ചിരുന്നു,”
വഴിത്തിരിവെന്നപോലെ കനേഡിയന്‍ കുടിയേറ്റ നയത്തില്‍ സര്‍ക്കാര്‍ ഇളവ് വരുത്തുന്നത് രണ്ടാം ലോക മഹായുദ്ധത്തിന് ശേഷമാണ്.
ഐക്യരാഷ്ട്രസഭയിലെ അംഗത്വത്തിനു പിന്നാലെ വംശീയ വിവേചനത്തിനെതിരായ പ്രഖ്യാപനം കാനഡ നടത്തിയതും കോമണ്‍വെല്‍ത്തിലെ അംഗത്വവും വംശീയത മുന്‍നിര്‍ത്തിയുള്ള ഇമിഗ്രേഷന്‍ നയം നടപ്പിലാക്കുന്നതില്‍ നിന്ന് കാനഡയെ പിന്തിരിപ്പിച്ചതോടെയാണ് ഇളവുകളുണ്ടാവുന്നത്. രണ്ടാം ലോകമഹായുദ്ധത്തിനുശേഷം സമ്പദ്വ്യവസ്ഥ വികസിപ്പിക്കാനായി തൊഴിലാളികളെ ആവശ്യമായി വന്നതും ഇളവുകള്‍ പ്രഖ്യപിക്കുന്നതിന് ആക്കം കൂട്ടി.
ഗുരു നാനാക് ദേവിലെ സോഷ്യോളജി വിഭാഗം പ്രൊഫസറും മേധാവിയുമായ പരംജിത് എസ്. യൂണിവേഴ്സിറ്റി, അമൃത്സര്‍, ഇക്കണോമിക് & പൊളിറ്റിക്കല്‍ വീക്ക്ലി മാഗസിനില്‍ പ്രസിദ്ധീകരിച്ച ‘മള്‍ട്ടികള്‍ച്ചറല്‍ സ്റ്റേറ്റില്‍ ഐഡന്റിറ്റിയുടെ സാമൂഹിക നിര്‍മ്മാണം: കാനഡയിലെ സിഖുകള്‍’ എന്ന 2003-ലെ ലേഖനത്തില്‍ പറയുന്നതിനനുസരിച്ചു, യൂറോപ്പില്‍ നിന്നുള്ള ആളുകളുടെ കുടിയേറ്റത്തില്‍ ഇടിവുണ്ടായതു മൂലം കനേഡിയന്‍ ഗവണ്‍മെന്റിന് മനുഷ്യ മൂലധനത്തിനായി മൂന്നാം ലോക രാജ്യങ്ങളെ ആശ്രയിക്കേണ്ടതായി വന്നു. ഈ മൂന്ന് കാരണങ്ങള്‍ വീണ്ടും കാനഡയിലേക്കുള്ള കുടിയേറ്റത്തിനുളള ആക്കം കൂട്ടി.
ഈ ഘടകങ്ങള്‍ 1967-ല്‍ കനേഡിയന്‍ ഗവണ്‍മെന്റ് ‘പോയിന്റ് സിസ്റ്റം’ അവതരിപ്പിക്കുന്നതിലേക്കും നയിച്ചു. കുടിയേറ്റകാരെ കഴിവിന്റെ ആധാരത്തില്‍ മാത്രം രാജ്യത്തേക്ക് പ്രവേശിപ്പിക്കുകയും ,ഒരു പ്രത്യേക വംശത്തിന് മുന്‍ഗണനകള്‍ നല്‍കുന്നതും കനേഡിയന്‍ സര്‍ക്കാര്‍ നിര്‍ത്തലാക്കി.
2021 ലെ കണക്ക് അനുസരിച്ച് 1.4 മില്യണ്‍ ഇന്ത്യക്കാര്‍ കാനഡയിലുണ്ട് ഒന്റാറിയോ പ്രവിശ്യയില്‍ മാത്രം 222,000 ഇന്ത്യക്കാര്‍ വസിക്കുന്നുണ്ട്. കാനഡയുടെ മൊത്തം ജനസംഖ്യയില്‍ രണ്ടു ശതമാനം സിഖുകാരാണ്. 770,000 സിഖുകാര്‍ രാജ്യത്തുണ്ടെന്നാണ് കണക്ക്. 2013-ല്‍ നിന്നും 2022 ല്‍ എത്തുമ്പോള്‍ കാനേഡിയന്‍ പൗരത്വം നേടുന്ന ഇന്ത്യക്കാര്‍ 260 ശതമാനം വര്‍ദ്ധിച്ചുവെന്നാണ് കണക്കുകള്‍ പറയുന്നത്. ഈ വര്‍ദ്ധനവിനിടയിലാണ് ഇപ്പോഴത്തെ പ്രശ്‌നങ്ങള്‍ ചര്‍ച്ചയാകുന്നത്. കഴിഞ്ഞ സെപ്റ്റംബര്‍ 22-നാണ് ഖാലിസ്ഥാന്‍ വിഘടനവാദി നേതാവ് ഹര്‍ദീപ് സിംഗ് നിജ്ജാറിന്റെ കൊലപാതകത്തില്‍ ഇന്ത്യക്ക് പങ്കുണ്ടെന്ന് കനേഡിയന്‍ പ്രധാനമന്ത്രി ജസ്റ്റിന്‍ ട്രൂഡോ പാര്‍ലിമെന്റില്‍ ആരോപിച്ചത്. നിജ്ജറിന്റെ വധവുമായി ബന്ധപ്പെട്ട് ഇന്ത്യയുടെ പങ്ക് വ്യക്തമാക്കുന്ന തെളിവുകളുണ്ടെന്നും ജസ്റ്റിന്‍ ട്രൂഡോ അവകാശപ്പെട്ടിരുന്നു. ഈ ആരോപണം നിഷേധിച്ച് രംഗത്തെത്തിയ ഇന്ത്യ, ഒട്ടാവയില്‍ ഖാലിസ്ഥാന്‍ ഭീകരര്‍ക്കും തീവ്രവാദികള്‍ക്കും അഭയം നല്‍കുന്നതായും മറ്റും ആരോപണം ഉയര്‍ത്തി. കനേഡിയന്‍ പൗരന്മാര്‍ക്ക് വിസ നല്‍കുന്നത് ഇന്ത്യ താത്ക്കാലികമായി നിര്‍ത്തിവെച്ചതോടെ ഇരു രാജ്യങ്ങളും തമ്മിലുള്ള നയതന്ത്ര ബന്ധത്തിന് വിള്ളല്‍ വീണിരിക്കുകയാണ്. എന്നാല്‍, ഇപ്പോഴത്തെ പ്രശ്‌നങ്ങള്‍ എല്ലാം വേഗത്തില്‍ തന്നെ പരിഹരിക്കപ്പെടുമെന്ന വിശ്വാസവും ശക്തമായിട്ടുണ്ട്.
